Müasir texnologiya və süni intellekt dövründə "OpenAI" şirkətinin hazırladığı "ChatGPT" kimi çatbotlar gündəlik həyatımızın ayrılmaz hissəsinə çevrilib. Danışıq aparmaq, suallara cavab vermək və müxtəlif mövzularda məlumat təqdim etmək bacarığı ilə seçilən bu alətlər istifadəçilərə rahatlıq və operativlik təqdim edir. Lakin onların imkanlarına baxmayaraq, müəyyən məlumatların paylaşılması ciddi risklər yarada bilər.

Valyuta.az xəbər verir ki, təhlükəsizliyin təmin olunması və şəxsi məlumatların qorunması üçün "ChatGPT" ilə aşağıda qeyd olunan beş mühüm məlumat heç vaxt paylaşılmamalıdır. Bu barədə mütəxəssislər xəbərdarlıq edir.

1. Şəxsi identifikasiyaedici məlumatlar 

Tam ad, doğum tarixi, ünvan, telefon nömrəsi, e-poçt ünvanı, sosial sığorta nömrəsi kimi şəxsi identifikasiyaedici məlumatların (PII) çatbotlarla paylaşılması təhlükəlidir. Hətta bu platformalar məlumatları qəsdən saxlamasa belə, kiberhücumlar nəticəsində sızmalar mümkündür. Belə hallar şəxsiyyət oğurluğu, maliyyə fırıldaqları və şəxsi məlumatların manipulyasiyası ilə nəticələnə bilər.

2. Maliyyə və bank məlumatları

Bank hesabları, kredit kartı nömrələri və digər ödəniş məlumatları kimi maliyyə detalları heç bir halda süni intellekt sistemləri ilə bölüşülməməlidir. Bu tip məlumatların təhlükəsizliyi yalnız şifrələnmiş və qorunan kanallar vasitəsilə təmin olunmalıdır. Əks halda, istifadəçilər dələduzluq, hesabların boşaldılması və maliyyə sabitliyinin pozulması kimi ciddi risklərlə üzləşə bilər.

3. Parollar və giriş məlumatları

Parollar və onlayn hesabların giriş məlumatları şəxsi məlumatların qorunmasında əsas açardır. Bu məlumatların "ChatGPT" kimi çatbotlarla paylaşılması sistemlərə icazəsiz müdaxilə riskini artırır. Güclü və unikal parollardan istifadə edilməli, iki mərhələli identifikasiya kimi əlavə təhlükəsizlik tədbirləri görülməlidir.

4. Şəxsi və ya məxfi məlumatlar

İstər şəxsi həyatla, istərsə də peşə fəaliyyəti ilə bağlı məxfi məlumatların süni intellekt sistemləri ilə bölüşülməsi arzuolunmaz nəticələrə səbəb ola bilər. Belə məlumatlar yanlış anlaşılma, yanlış yönləndirmə və məlumatların qeyri-qanuni yayılması ilə nəticələnə bilər. Xüsusilə işgüzar mühitdə belə məlumatların paylaşılması hüquqi məsuliyyət və etimadın itirilməsi ilə nəticələnə bilər.

5. Müəllif hüquqları və əqli mülkiyyət

Patentləşdirilmiş ideyalar, kommersiya sirləri və müəllif hüquqları ilə qorunan materialların "ChatGPT" kimi sistemlərlə paylaşılması onların oğurlanması və ya icazəsiz istifadəsi riskini daşıyır. Belə məlumatların yayılması həm hüquqi, həm də maliyyə baxımından ciddi nəticələrə gətirib çıxara bilər. Bu səbəbdən istifadəçilər əqli mülkiyyətlərini qorumaq üçün diqqətli olmalıdırlar.

Qeyd edək ki, texnologiyanın inkişafı ilə məlumat sızmaları daha da aktuallaşıb. Kiberhücumçular zəif nöqtələri taparaq fərdi məlumatlara daxil olmağa çalışırlar. Məsələn, 2022-ci ilin iyunundan 2023-cü ilin mayınadək 100 mindən çox ödənişli "ChatGPT" istifadəçisinin hesab məlumatlarının “darknet” yəni, qara şəbəkə bazarlarında satışa çıxarılması bunun ciddi nümunəsidir. Süni intellekt sistemləri istifadəçilərə yeni imkanlar təqdim etsə də, şəxsi və məxfi məlumatların qorunması prioritet olaraq qalmalıdır. İstifadəçilər şəxsi identifikasiyaedici məlumatları, maliyyə detalları, parollar, məxfi məlumatlar və əqli mülkiyyətlə bağlı məlumatları bu sistemlərlə paylaşmaqdan çəkinməlidir.

Sərvanə Rəmixanova