Dünyanın ən böyük geyim pərakəndəçilərindən biri olan "H&M" bu il modellərinin 30 "rəqəmsal əkiz"ini yaratmaq niyyətindədir. 

Valyuta.Az xəbər verir ki, bu barədə şirkətdən "CNN" telekanalına bildirilib. 

Şirkət bu avatarların necə istifadə olunacağını hələ də "araşdırdığını" vurğulayıb. Qeyd olunub ki, bu təşəbbüsün "məsuliyyətli şəkildə" həyata keçirilməsi üçün agentliklər və modellərin özləri də daxil olmaqla sənayedəki digər tərəfdaşlarla əməkdaşlıq edilir.

Şirkətin sözlərinə görə, modellər öz rəqəmsal əkizlərinin hüquqlarına sahib olacaqlar və bu klonlar istənilən brend üçün istifadə edildikdə, modellər hər dəfə kampaniya çəkilişində iştirak etmiş kimi qonorar alacaqlar.

"H&M"in bu açıqlaması artıq moda sənayesində müəyyən narazılıqlara səbəb olub. Çünki bu sahədə çalışan bir çox insan onsuz da qeyri-sabit iş şəraitində fəaliyyət göstərir.

Model kimi fəaliyyətə başlayıb, sonradan əmək hüquqları müdafiəçisinə çevrilmiş və Nyu-Yorkda yerləşən "Model Alliance" adlı qeyri-kommersiya təşkilatını təsis etmiş Sara Ziff bəyan edib ki, "mühafizə mexanizmləri olmadan rəqəmsal surətlərin istifadəsi ilə bağlı ciddi narahatlıqları var".

"Tarixən əmək hüquqları baxımından geridə qalmış bu sənayedə, 'H&M'in yeni təşəbbüsü razılıq və əmək haqqı ilə bağlı mühüm suallar doğurur və vizajistlər, saç ustaları və digər yaradıcı işçilər də daxil olmaqla bir çox peşə sahiblərini əvəzləyə bilər," – deyə Ziff əlavə edib.

Qeyd edək ki, "H&M" bu texnologiyalardan istifadə edən ilk brend deyil. "Levi Strauss & Co." 2023-cü ilin mart ayında süni intellektlə yaradılan modellərdən insan modelləri "tamamlayacaq" şəkildə istifadə etməyi planlaşdırdığını açıqlamışdı. Lakin sərt tənqidlərlə üzləşdikdən sonra şirkət canlı fotosessiyalardan imtina etmək niyyətində olmadığını qeyd etmişdi.

Ötən ilin iyul ayında isə İspaniyanın "Mango" brendi gənclər kolleksiyasının tanıdılması üçün tamamilə suni intellekt ilə yaradılmış kampaniya həyata keçirmişdi.

Bu arada, süni intellektlə yaradılmış influenserlər və modellər getdikcə yayılmağa başlayıb. Hətta ötən il dünyanın ilk süni intellekt gözəllik müsabiqəsi də keçirilib.

Rəhim