İlon Mask süni intellekt şirkəti olan "xAI"nin onun nəzarətində olan "X" sosial platformasını 33 milyard dollar dəyərində satın aldığını açıqlayıb. Mask bu əməliyyatı tamamilə səhmlər üzərindən həyata keçirdiyini və bununla da iki əsas texnoloji struktur arasında daha dərin inteqrasiya yaratdığını bildirib.

Valyuta.Az xəbər verir ki, Mask "X" hesabında paylaşdığı məlumatda qeyd edib ki, birləşmə "xAI"ni 80 milyard, "X"i isə 33 milyard dollar olaraq qiymətləndirir. O əlavə edib ki, "X"in 12 milyard dollarlıq borcu da nəzərə alındıqda, platformanın ümumi dəyəri 45 milyard dollara çatır.

Məsələ ilə tanış mənbələrin bildirdiyinə görə, bu struktur dəyişikliyi nəticəsində "XAI Holdings" adlı yeni bir vahid korporativ qurum yaradılıb. Bu qurum, hər iki şirkətin imkanlarını bir araya gətirərək 100 milyard dollardan çox ümumi dəyərə sahib olacaq. Qeyd olunur ki, razılaşmada "Morgan Stanley" yeganə maliyyə məsləhətçisi kimi çıxış edib və hər iki tərəfi təmsil edib.

Mask bu addımı ilə "xAI"nin süni intellekt sahəsindəki gücünü "X" platformasının geniş istifadəçi bazası və məlumat imkanları ilə birləşdirməyi hədəfləyir. O, paylaşımında bildirib:  “'xAI' və 'X'in gələcəkləri bir-biri ilə sıx bağlıdır; bu gün məlumatları, modelləri, hesablamanı, paylanmanı və istedadı birləşdirmək üçün rəsmi addım atırıq. Bu sinergiya, süni intellekt texnologiyalarında böyük potensialın qarşısını açacaq.”

Qeyd edək ki, İlon Mask 2022-ci ilin oktyabrında "Twitter"i təxminən 44 milyard dollara satın almış, daha sonra platformanın adını "X" olaraq dəyişmişdi. İndi isə bu yeni strukturla o, həm sosial media, həm də süni intellekt sahəsində daha inteqrasiya olunmuş texnoloji ekosistem qurmağa çalışır.

Rəhim