"BP" şirkəti baş direktor Mörrey Akinqlossun rəhbərliyi ilə həyata keçirilən yenidənqurma strategiyası çərçivəsində Avstriyadakı  mobil xidmət və pərakəndə satış biznesini satmağı planlaşdırır.

Valyuta.Az xəbər verir ki, satışa çıxarılacaq aktivlərə ölkə üzrə 260-dan çox yanacaqdoldurma məntəqəsi, bu məntəqələrlə bağlı Avstriyadakı korporativ nəqliyyat biznesi, elektromobil enerji doldurma infrastrukturu və "BP"nin Linz yanacaq terminalını idarə edən, lakin operator olmayan birgə müəssisədəki payları daxildir.

"BP" şirkətinin müştərilər və məhsullar üzrə icraçı vitse-prezidenti Emma Delani bildirib: “Hazırda 'BP' olaraq diqqətimizi satış və emal (downstream) sahəsinə yönəldərək portfelimizi yenidən formalaşdırdığımız bir vaxtda, hesab edirik ki, bu biznesin tam potensialını ortaya çıxarmaq üçün yeni sahib daha əlverişli mövqedə olacaq.”

Xatırladaq ki, "BP" bu ilin fevral ayında yeni strategiya çərçivəsində 2027-ci ilə qədər 20 milyard dollarlıq aktivlərin satışını nəzərdə tutan planını açıqlamışdı. Bu yanaşma şirkətin bərpa olunan enerji sahəsindəki fəaliyyətini azaltmaq və neft-qaz sahəsinə investisiyaları artırmaq məqsədi daşıyır.

Şirkətin bildirdiyinə görə, Avstriyadakı aktivlərin satışı üzrə marketinq prosesi dərhal başlanacaq və satış müqaviləsinin bu ilin üçüncü rübünün sonuna qədər tamamlanması hədəflənir.

Rəhim