Yaponiyada 40 ildən çox müddətdə ölüm hökmü ilə həbsdə saxlanılan və ötən il bəraət alan keçmiş peşəkar boksçu İvao Hakamataya 1,4 milyon ABŞ dolları (təxminən 217 milyon yen) məbləğində təzminat ödənilib. 

Valyuta.Az xəbər verir ki, bu, onun haqsız yerə məhkum olunduğu hər gün üçün təxminən 85 dollar təzminat deməkdir.

1968-ci ildə dörd nəfərin qətlə yetirilməsi işi üzrə ölüm hökmünə məhkum edilən Hakamata dəfələrlə polis tərəfindən sübutların saxtalaşdırıldığını bildirsə də, məhkəmə onun iddialarını rədd edib.

Dünyanın ən uzun müddət ölüm hökmündə saxlanılan məhbusu olan Hakamata yalnız 2014-cü ildə yeni sübutlar əsasında azadlığa buraxılmış və ötən il keçirilən yenidən baxılmış məhkəmədə bəraət almışdı. 

"NHK"nin məlumatına görə, DNT testləri onun məhkum edilməsində əsas sübut kimi təqdim edilən qanlı geyimlərin cinayətdən xeyli sonra hadisə yerinə yerləşdirildiyini üzə çıxarmışdı.

“Məncə, dövlət elə bir səhv edib ki, bu, 200 milyon yenlə düzəldilə bilməz,” – deyə vəkil "NHK"yə bildirib.

Hakamata 1961-ci ildə peşəkar boksçu kimi fəaliyyətini dayandırdıqdan sonra Yaponiyanın mərkəzində yerləşən "Shizuoka" prefekturasında soya məhsulları istehsalı müəssisəsində işə düzəlmişdi. Beş il sonra isə işlədiyi müəssisənin rəhbəri, onun həyat yoldaşı və iki uşağı evlərində bıçaqlanaraq öldürülmüş halda tapıldıqdan sonra Hakamata polis tərəfindən saxlanılmışdı.

O, əvvəlcə ittihamları qəbul etsə də, sonradan ifadəsini dəyişərək polis tərəfindən döyüldüyünü və hədələndiyini, buna görə də etirafa məcbur edildiyini bildirmişdi.

1968-ci ildə keçirilən məhkəmədə iki hakimin lehinə, birinin isə əleyhinə səs verməsi ilə Hakamata ölüm cəzasına məhkum edilmişdi. Əleyhinə səs verən hakim altı ay sonra vəzifəsindən istefa verərək, hökmdə qərarı dayandıra bilmədiyinə görə ruhdan düşdüyünü bildirmişdi.

Rəhim