"Google" reklam bloklayıcıları təsirsiz hala gətirmək üçün "Chrome"dan kənar brauzerlərdə "YouTube" videolarının izlənməsini demək olar ki, mümkünsüz edib.

Valyuta.az xəbər verir ki, ıgər indiyə qədər brauzerinizdə reklam bloklayıcını aktiv edərək "YouTube"da rahatlıqla video izləyirdinizsə, artıq bu proses sizin üçün çətinləşə bilər. Belə ki, "YouTube" videonun göstərilməsini dayandıraraq ekranınıza böyük xəbərdarlıq banneri yerləşdirir və sizi bu cür bloklayıcılardan imtina etməyə çağırır. Bu xəbərdarlıq, istifadəçiləri ya reklam bloklayıcını söndürməyə, ya da ödənişli abunə xidməti olan "YouTube Premium"a keçməyə təşviq edir.

"Google" banner vasitəsilə açıq mesaj verir: "Reklam bloklayıcıları "YouTube"un Xidmət Şərtlərini pozur". Bu, şirkətin yalnız istifadəçiləri "Premium"a yönləndirmək istəyini deyil, həm də reklam gəlirlərini qorumaq əzmində olduğunu göstərir. Daha maraqlısı isə "Google"ın reklam bloklayıcılara qarşı yeni texnologiya üzərində işləməsidir. Bu yenilik sayəsində reklamlar birbaşa videoların içərisinə yerləşdiriləcək və reklam bloklayıcı proqramlar onları aşkar edə bilməyəcək.

Bu, "YouTube" və "Google" ətrafında baş verən ilk mübahisə deyil. 2023-cü ildə "Google" "Firefox" brauzerində "YouTube"un qəsdən yavaşladılması ilə bağlı iddialarla üzləşmişdi. Lakin şirkət bu iddiaları qəti şəkildə təkzib etmişdi. Bir neçə ay sonra eyni məsələ yenidən gündəmə gəldikdə, bu dəfə problem "Adblock" əlavəsinin özündən qaynaqlandığı etiraf olunmuşdu. Bundan başqa, "Reklamı keç" düyməsinin bilərəkdən gizlədildiyi ilə bağlı iddialar da ortaya çıxmış, lakin "Google" bu məsələdə də günahsız olduğunu bildirmişdi.

Bu gün "Google" reklam bloklayıcıları aşkar etmək üçün daha inkişaf etmiş metodlardan istifadə edir. Xüsusilə, "Opera" və "Firefox" brauzerlərində reklam bloklayıcının mövcudluğundan şübhələndikdə, brauzerə fərqli sorğular göndərərək video izləməni çətinləşdirir. Artıq "YouTube" reklam bloklayıcının söndürüldüyünü təsdiqləmədən istifadəçilərə məzmun göstərmir. Bu isə video izləmə prosesini daha mürəkkəb və narahat edici hala gətirir.

Əgər hazırda brauzerinizdə reklam bloklayıcıdan istifadə edirsinizsə, "YouTube"un videonu dərhal dayandırması ilə qarşılaşa bilərsiniz. Bu halda ekranda "Qaydaları pozmusunuz" mesajı olan bir banner görmək qaçılmazdır. Görünən odur ki, "Google"ın bu strategiyası ilə reklam bloklayıcıların dövrü sürətlə başa çatır.

Paşa Məmmədli