"Azərbaycan Respublikasının Kosmik Agentliyi”nin (Azərkosmos) Yaponiya banklarına olan 19,4 mln. avro həcmində qalıq faiz borcunu yerli bank qarşılayacaq.

Bu, Nazirlər Kabinetinin 2024-cü il üzrə hesabatında əksini tapıb.

Qeyd edilib ki, “Azərkosmos” Azərbaycanda Yerin məsafədən peyk müşahidə sisteminin yaradılması məqsədilə 2015-ci ildə dövlət zəmanətli Kredit Sazişi əsasında Yaponiyanın "Sumitomo Mitsui" və "Mizuho" banklarından 129 mln. avro məbləğində kredit vəsaiti cəlb edilib.

Dövlət zəmanətli Kredit Sazişinin şərtlərinə uyğun olaraq Euribor+0,75% dərəcəsi ilə hesablanan kredit faizləri "Azərkosmos"un maliyyə öhdəliklərinin artmasına səbəb olub.

Kredit Sazişi üzrə 2024-cü ilə 19,4 mln. avro məbləğində qalıq kredit vəsaitinə hesablanacaq faiz xərclərində qənaət edilməsi məqsədilə "Paşa Bank" ASC-dən daha səmərəli şərtlərlə dövlət zəmanətli kredit vəsaitinin cəlb olunaraq qalıq kredit vəsaiti ilə əvəzlənməsi təklif edilib. Tərəflər arasında illik 4 faiz dərəcəsi ilə 2 il müddətinə 19.4 mln. avro məbləğində dövlət zəmanəti ile təmin edilmiş kredit vəsaitinin cəlb olunması nəzərdə tutulub. Kreditlə bağlı zəmanət sazişi Nazirlər Kabinetinin 2024-cü il 2 dekabr tarixli Sərəncamı ilə təsdiq edilib.

©apa