Tələbələrə maliyyə dəstəyi göstərmək və təhsil həyatını daha rahat keçirmək məqsədilə dövlət və müxtəlif qurumlar tərəfindən tələbə təqaüdləri təyin edilir.

Bu təqaüdlər yüksək akademik göstəricilərə, dövlət və ya universitet səviyyəsindəki sosial ehtiyaclara, elmi fəaliyyətlər və digər göstəricilərə görə təyin edilir. Hər bir təqaüdün verilmə prinsipləri və məbləği müəyyən olunmuş qaydalara əsaslanır. 

Azərbaycanda tələbə təqaüdlərinin məbləği isə müxtəlif faktorlar, o cümlədən dövlət büdcəsi və təhsil siyasətinə uyğun olaraq dəyişə bilər.

Valyuta.az xəbər verir ki, ölkəmizdə tələbə təqaüdləri müxtəlif növ və məbləğlərdə ola bilər və bir neçə kateqoriya üzrə qruplaşdırılıb:

Prezident təqaüdü

Azərbaycan Respublikası ərazisində tələbələrə verilən ən yüksək təqaüd Azərbaycan Respublikasının Prezidentinin təqüdüdür. Bu təqaüd  yüksək akademik nəticələrə və uğurlu təhsil göstəricilərinə malik tələbələr üçün verilən ən yüksək təqaüddür. Bu təqaüd məbləği Prezident tərəfindən artırıla bilər. Belə ki, Prezident İlham Əliyevin  fərmanı ilə Azərbaycan Respublikasının ali məktəb tələbələri üçün Prezident təqaüdünün məbləği 2023-cü il yanvarın 1-dən 275 manat müəyyən edilib.

Qeyd edək ki, dəyişikliyə qədər bu kateqoriyadan olan şəxslərə verilən təqaüdün məbləği 250 manat idi.

Elm və Təhsil Nazirliyi tərəfindən verilən təqaüd və xüsusi təqaüd

Elm və Təhsil Nazirliyi tərəfindən verilən təqaüdlər, əsasən sosial və akademik göstəricilərinə əsaslanır. Bu təqaüdlər ehtiyacı olan və az təminatlı tələbələr üçün nəzərdə tutulub. Bu təqaüdün məbləği 150-200 manat arasında dəyişə bilər. Nazirlik tərəfindən verilən xüsusi təqaüdlər isə elmi tədqiqatlarla məşğul olan və müvafiq sahələrdə fərqlənən tələbələrə verilir. Bu təqaüdlərin də məbləği 150-200 manat civarındadır.

Universitet daxili təqaüdlər

Hər bir universitet, öz daxilində yüksək akademik nəticə göstərən və ya müxtəlif sahələrdə uğurlar qazanan tələbələrə təqaüd verir. Bu təqaüdlər universitetin siyasətinə və büdcəsinə əsaslanır və məbləğlər 100-300 manat arasında dəyişir.

Sosial təqaüdlər

Az təminatlı və sosial dəstəyə ehtiyacı olan tələbələrə verilən təqaüdlərdir. Bu təqaüdün məbləği, adətən 100-150 manat civarındadır, lakin müəyyən universitetlərdə bu məbləğ artım göstərə bilər.

Xatırladaq ki, hazırda Azərbaycanda dövlət büdcəsinin vəsaiti hesabına doktorantlara, ali təhsil, orta ixtisas və peşə təhsili müəssisələrində, həmçinin Azərbaycan Milli Elmlər Akademiyasının magistratura səviyyəsində təhsil alan tələbələrinə verilən təqaüdlərin məbləği aşağıdakı kimidir:

Doktorantura pilləsi üzrə:

elmlər doktoru hazırlığı üzrə doktorantlara – 400 manat
fəlsəfə doktoru hazırlığı üzrə doktorantlara – 240  manat 

Azərbaycanda tələbələrə verilən təqaüdlərin məbləği onların akademik göstəricilərinə və təhsil səviyyələrinə görə müəyyən edilir. 2023-cü il yanvarın 1-dən etibarən tətbiq olunan təqaüd məbləğləri aşağıdakı kimidir:

Bakalavriat səviyyəsi üzrə:

Əlaçı təqaüdü (91–100 bal): 175 manat
Həvəsləndirici təqaüd (71–100 bal): 145 manat
Adi təqaüd (51–100 bal): 100 manat

Orta ixtisas təhsili müəssisələrində:

Əlaçı təqaüdü (91–100 bal): 100 manat
Həvəsləndirici təqaüd (71–100 bal): 80 manat
Adi təqaüd (51–100 bal): 66 manat

Peşə təhsili müəssisələrində:

Əlaçı təqaüdü ("5" qiymət və ya 91–100 bal): 100 manat
Həvəsləndirici təqaüd ("4" və "5" qiymətlər və ya 71–100 bal): 80 manat
Adi təqaüd ("3"–"5" qiymətlər və ya 51–100 bal): 66 manat

Qeyd edək ki, hazırda dövlət ali təhsil müəssisələri tələbələrinin 54,3 faizi təqaüd alır

Davud