ABŞ Prezidenti Donald Tramp rəqəmsal aktivlər üzrə ehtiyat yaratmaq niyyətini açıqlayıb. Onun sözlərinə görə, bu ehtiyat “Bitcoin”, “Ethereum”, “Solana” (SOL), "XRP",  “Cardano” kimi rəqəmsal aktivləri əhatə edəcək. 

Valyuta.az xəbər verir ki, bu xəbərlə “Bitcoin”in qiyməti 10%, “Ethereum” isə 13% artıb. Lakin ehtiyatın necə maliyyələşdiriləcəyi hələ də qeyri-müəyyəndir və bu məsələyə cümə günü Ağ Evdə keçiriləcək Kriptovalyuta Sammitində aydınlıq gətiriləcəyi gözlənilir.

Ekspertlər hökumətin 36 trilyon dollarlıq borcu fonunda bu ehtiyatı necə formalaşdıracağını sual altına alırlar. Bəzi mütəxəssislər ehtiyatın cinayət işlərindən müsadirə edilən kriptovalyutalar hesabına yaradılacağını ehtimal etsələr də, bu, yeni tələb formalaşdırmayacaq.
Digər tərəfdən Trampın Kanada və Meksikaya 25%, Çinə isə əlavə 10% tarif tətbiq edib-etməyəcəyi də qeyri-müəyyəndir. ABŞ-ın ticarət naziri tariflərin çərşənbə axşamı qüvvəyə minəcəyini bildirsə də, yekun qərarın hələ verilmədiyini deyib. Analitiklər tariflərin tətbiqinin ABŞ istehlakçılarına əlavə vergi yükü yaradacağını və iqtisadiyyata mənfi təsir göstərə biləcəyini düşünürlər.

Cümə günü açıqlanacaq məşğulluq statistikaları və Federal Ehtiyat Sistemi sədri Cerom Pauellin həmin gün edəcəyi çıxış maliyyə bazarları üçün həlledici ola bilər. Digər mühüm hadisə isə çərşənbə günü Çin Xalq Konqresinin iclasıdır. Burada 2-3 trilyon yuan (təxminən 274-412 milyard dollar) həcmində yeni iqtisadi stimullaşdırma paketi elan edilə bilər.

Sərvanə Rəmixanova