Rusiya hökuməti milli brend olan "Made in Russia" proqramının 2030-cu ilə qədər xaricdə yerli məhsulların tanıdılması məqsədilə təsdiqləyib.

Valyuta.az xəbər verir ki, bu barədə Rusiya İxrac Mərkəzinin mətbuat xidməti məlumat yayıb.

“Məqsəd proqram çərçivəsində maraqlı xarici ölkələrlə dayanıqlı tərəfdaşlıq əlaqələri qurmaq, xarici iqtisadi fəaliyyət və texnoloji əməkdaşlıq üçün zəruri infrastruktur yaratmaqdır”,- deyə məlumatda bildirilir.

Proqramın koordinasiyasını Sənaye və Ticarət Nazirliyi, onun təmin edilməsi və icrasına cavabdehlik isə Rusiya İxrac Mərkəzi həyata keçirəcək.

Məqsəd 2023-cü ilin göstəriciləri ilə müqayisədə qeyri-xammal və qeyri-enerji ixracının həcmini azı üçdə iki qədər artırmaq, həmçinin 2021-ci illə müqayisədə aqrosənaye kompleksinin ixracını 1,5 dəfə artırmaqdır.

Rusiya Sənaye və Ticarət nazirinin müavini Roman Çekuşovun sözlərinə görə, "Made in Russia" proqramı Rusiya məhsullarının vahid brend altında xarici bazarlarda tanıdılması üçün geniş tədbirlər kompleksini nəzərdə tutur. Buraya beynəlxalq biznes missiyalarının təşkili, beynəlxalq sərgilərin keçirilməsi, ixracatçı şirkətlərin kataloqunun yer aldığı çoxdilli veb-saytın yaradılması və digər tədbirlər daxildir.

Rusiya İxrac Mərkəzinin baş direktoru Veronika Nikişina bildirib ki, mərkəz artıq BRİKS, Asiya-Sakit Okean regionu (ASO), Yaxın Şərq və Afrikada 300-dən çox sərgi və biznes missiyası təşkil edib. Çində dörd, BƏƏ-də isə bir festival keçirilib.