Bu ilin yanvar ayında “Atəşgah Sığorta” şirkətinin zərərliliyi kəskin artıb. 

Valyuta.az-ın hesablamasına görə, sığorta şirkətinin zərərliliyi, yəni ödəniş-yığım nisbəti ötən ilin eyni dövrünə nisbətən bu ilin yanvar ayında 32%-dən 56,3%-ə yüksəlib.

Başqa sözlə, sığorta şirkəti ötən ilin yanvar ayında topladığı hər 100 manata görə 32 manat ödəniş edibsə, bu ilin eyni dövründə bu rəqəm 56,3 manata bərabər olub. Bu isə o deməkdir ki, şirkətin zərərliliyi son bir ildə 75,6% artıb.

Buna səbəb ödənişlərin kəskin artması olub. Belə ki, sığorta şirkətinin yığımları yanvar ayında 17,5% artaraq 4,9 milyon manata çatıb. Ödənişləri isə 2 dəfə artaraq 2,77 milyon manata yüksəlib. 2024-cü ilin yanvar ayında isə bu rəqəm 1,34 milyon manat təşkil edib.

Qeyd edək ki, “Atəşgah Sığorta” bu ilin yanvar ayında zərərliliyi ən yüksək olan sığorta şirkəti olub. Qeyri-həyat sığortası üzrə digər 10 sığorta şirkətinin zərərliliyi isə 50%-dən aşağı olub.  

Ümumilikdə isə əvvəlki aylarla müqayisədə Azərbaycan sığorta şirkətlərinin zərərliliyi xeyli aşağı düşüb. Ötən il bu göstərici bəzi sığorta şirkətləri üzrə hətta 100%-in üzərində olub.