Bu gün "Apple" şirkəti növbəti dörd il ərzində ABŞ-a 500 milyard dollar sərmayə qoymağı və orada tədqiqat və inkişaf sahəsində 20 min iş yeri yaratmağı planlaşdırdığını açıqlayıb. 

Valyuta.az xəbər verir ki, xüsusilə şirkət Texasda süni intellekt sistemləri üçün serverlər istehsal edəcək zavodun tikintisinə və Arizonada Tayvanın TSMC şirkəti tərəfindən çiplərin istehsalına investisiya qoymağı planlaşdırır. 

Korporasiya həmçinin ölkə daxilində mövcud təchizatçılardan alışları artırmağı planlaşdırır.

"Apple" bu barədə baş direktr Tim Kukun keçən həftə ABŞ prezidenti Donald Trampla görüşündən sonra açıqlama verib. Görüşdən sonra prezident korporasiyanın ölkə daxilində “yüz milyardlarla dollar investisiya yatırdığını” bildirib. 

"Apple"ın istehlakçı texnologiyasının böyük hissəsi ABŞ-dan kənarda istehsal olunur, yəni o, Trampın tətbiq etmək istədiyi daha yüksək tariflərə məruz qala bilər. Eyni zamanda, avadanlıq üçün bir çox komponentlər, o cümlədən "Broadcom", SkyWorks Solutions" və "Qorovo" şirkətlərinin yüksək texnologiyalı çipləri ABŞ-da istehsal olunur.

Paşa Məmmədli