"Counterpoint Research" şirkətinin son hesabatına görə, 2024-cü ildə satışa çıxarılan smartfonların 25%-i premium (yüksək səviyyəli) modellər olub. 

Valyuta.az xəbər verir ki, bu tendensiya 600 ABŞ dolları və daha yüksək qiymətə satılan cihazlara marağın artdığını göstərir.

Premium modellərin bazar payı artır

2020-ci ildə premium smartfonlar bazarın 15%-ni təşkil edirdi, lakin 2024-cü ildə bu rəqəm 25%-ə yüksəlib. Daha çox funksiyaya və yüksək keyfiyyətə sahib cihazlara olan tələb bahalı smartfonların populyarlığını artırıb.

"Apple" liderliyini qoruyur, ultra premium seqment böyüyür

Premium smartfon seqmentində "Apple" 67% bazar payı ilə liderliyini qoruyur. Lakin bu göstərici ötən ilki 72%-lik paydan bir qədər aşağıdır. Buna baxmayaraq, "Samsung", "Huawei", "Xiaomi" və "Google" kimi markalar hələ də "Apple"ın gerisindədir.

Digər tərəfdən, "Ultra Premium" kateqoriyasına aid smartfonların (1.000 dollar və daha bahalı modellər) bazar payı ilk dəfə 40%-i keçib. "iPhone"un orta satış qiyməti ilk dəfə 900 dolları keçərək "Apple"ın bu seqmentdə üstünlüyünü daha da möhkəmləndirib.

Hesabatda qeyd olunur ki, istehsalçılar indi satış həcmi yerinə gəlirə üstünlük verirlər. Premium seqmentdə illik 8%-lik artım müşahidə olunur ki, bu da ümumi smartfon bazarının 5%-lik artımını üstələyir.

Ölkələr üzrə premium smartfon bazarı

ABŞ 2024-cü ildə premium smartfon seqmentinə 25%-lik payla ən böyük töhfəni verib.

Çin 24% bazar payı ilə ikinci yerdədir.

Hindistan, ümumilikdə ən böyük smartfon bazarlarından biri olmaqla yanaşı, 2020-ci ildən bəri premium seqmentdə 5 dəfə böyümə nümayiş etdirib.

Bu göstəricilər istehlakçıların daha keyfiyyətli və bahalı cihazlara yönəldiyini sübut edir və gələcək illərdə premium seqmentin daha da genişlənəcəyini göstərir.

Paşa Məmmədli