Gələn həftə "Nvidia"nın mənfəət hesabatı ABŞ fond bazarının gedişatına təsir edə bilər. İnvestorlar son iki ildə səhmlərin sürətli yüksəlişinə səbəb olan süni intellekt əsaslı investisiya dalğasının davam edib-etmədiyini yoxlamaq istəyirlər. 

Valyuta.Az "Reuters"ə istinadla xəbər verir ki, süni intellekt sənayesinin aparıcı göstəricisi kimi qəbul edilən "Nvidia", LSEG-in məlumatına görə, hazırda dünyanın ikinci ən dəyərli şirkətidir və "S&P 500" indeksində 6,3%-lik paya sahibdir. Şirkətin səhmləri son iki ildə 550%-dən çox artıb.

Lakin yanvarın 27-də Çin şirkəti "DeepSeek"in daha sərfəli süni intellekt modeli təqdim etməsi nəticəsində "Nvidia"nın bazar dəyərində rekord həcmdə – təxminən 593 milyard dollarlıq – birgünlük itki baş verdi və səhmlər 17% ucuzlaşdı. Şirkət bu geriləmədən sonra demək olar ki, tam bərpa olunsa da, bəzi investorlar mənfəət hesabatlarının bazarda yenidən dalğalanmalara səbəb ola biləcəyindən narahatdır.

Bazarın reaksiyası necə olacaq?  

"Allspring"in artım istiqamətli səhmlər üzrə rəhbəri Mayk Smit bildirib ki, "Nvidia"nın gələn həftəki konfransı öncəsi bazarda gərginlik var.  

"İnvestorlar "Nvidia"nın zirvə nöqtəsinə çatdığını elan etmək istəyirlər. Bu səbəbdən bazarda müəyyən dəyişikliklərin və hətta kəskin reaksiya dalğalarının şahidi ola bilərik", – deyə o bildirib. O əlavə edib ki, bəzi investorlar süni intellekt sektoru ilə bağlı yatırımlarını səhiyyə, proqram təminatı və maliyyə sektoruna yönəldə bilərlər.  

Opsion bazarına əsasən, "Nvidia" səhmlərinin hesabatdan sonra 7,7% dəyişməsi gözlənilir ki, bu da son 12 rübdə hesabat günündən sonrakı orta 7,6%-lik hərəkətlə eynidir. Şirkətin cari bazar dəyəri 3,4 trilyon dollar civarındadır və gözlənilən bu dəyişiklik təxminən 260 milyard dollarlıq bazar dəyəri fərqi deməkdir – bu da "Wells Fargo" (WFC.N) kimi iri bir şirkətin ümumi dəyərinə bərabərdir.  

Gözləntilər və "Nvidia"nın sektora təsiri  

LSEG-in məlumatına görə, "Nvidia" fevralın 26-da 20,89 milyard dollarlıq dördüncü rüb gəliri elan edəcək ki, bu da ötən ilin müvafiq dövrü ilə müqayisədə 72%-lik artım deməkdir.  

İnvestorlar şirkətin süni intellekt çipləri üçün təklif və tələb barədə verdiyi proqnozlara xüsusi diqqət yetirəcəklər. Çünki bu, həm "Nvidia"nın yüksək dəyərləndirməsini, həm də ümumilikdə süni intellekt sektorunun perspektivlərini əsaslandırmalıdır.  

Hazırda "Nvidia"nın 12 aylıq gəlir proqnozları üzrə qiymət/qazanc nisbəti 32-dir, bu isə noyabrın əvvəlindəki 40-lıq göstəricidən aşağıdır. Müqayisə üçün, "S&P 500" indeksinin orta qiymət/qazanc nisbəti 22-dir.  

"Raymond James Investment Management"in baş bazar strateqi Matt Orton bildirib ki, "Nvidia" bazarda investor əhval-ruhiyyəsini yenidən formalaşdıra biləcək əsas amildir.  

"Bazar ABŞ-ın tarif və fiskal siyasəti, pərakəndə satışların azalması və gözləniləndən yüksək inflyasiya kimi qeyri-müəyyənliklərə baxmayaraq, yaxşı performans göstərib. "Nvidia" bazarın yenidən yüksəlişə keçməsi üçün təkan ola bilər", – deyə o qeyd edib.  

Yanvardakı "DeepSeek" hadisəsindən sonra bazarda bəzi dəyişikliklər baş verib. "Nvidia"nın ümumi bazara təsiri zəifləyib. "Schwab"ın hesablamalarına görə, "Nvidia" ilə "S&P 500" arasındakı korrelyasiya 2024-cü ildəki 71%-dən 2025-ci ildə 30%-ə düşüb.  

Bununla belə, "Nvidia"nın bazardakı psixoloji təsiri hələ də böyükdür. "Schwab"ın ticarət və törəmə alətlər üzrə strateqi Co Mazzola bildirib ki, şirkətin bazara təsiri statistikadan çox psixoloji xarakter daşıyır.  

İnflyasiya və Federal Ehtiyat Sistemi ("Fed") gözləntiləri  

Gələn həftə ABŞ-də yanvar ayı üzrə inflyasiya göstəriciləri də açıqlanacaq. Dekabrda inflyasiyanın son səkkiz ayda ən yüksək səviyyəyə çatması və istehlak xərclərinin güclü qalması bazar üçün önəmli siqnallar verib.  

Əgər inflyasiya gözləniləndən yüksək çıxarsa, bu, Federal Ehtiyat Sisteminin faiz dərəcələrini azaltmaq üçün daha uzun müddət gözləməsinə səbəb ola bilər.  

Rəhim