Uorren Baffetin (Warren Buffett) rəhbərlik etdiyi "Berkshire Hathaway" şirkəti ardıcıl üçüncü dəfə illik əməliyyat mənfəətində rekord göstərici əldə edib. Bu artım, əsasən, sığorta biznesində sığorta haqqı gəlirlərinin və investisiya gəlirlərinin artması hesabına baş verib.  

Valyuta.Az "Reuters"ə istinadən xəbər verir ki, bu gəlirin böyük hissəsi "Berkshire"in 2024-cü ilin sonunda rekord səviyyəyə – 334,2 milyard dollara çatmış nəhəng nağd pul ehtiyatından qaynaqlanıb ki, bu da bir il əvvəlkindən iki dəfə çoxdur.  

"Berkshire" səhmdarlarına ünvanladığı illik məktubunda Baffet vurğulayıb ki, şirkət nağd vəsait saxlamaqdansa, bizneslərə investisiya qoymağa üstünlük verir.  

Bununla belə, o, Omaha, Nebraska mərkəzli holdinqin gözlədiyindən daha yaxşı nəticə göstərdiyini qeyd edib, baxmayaraq ki, 189 əməliyyat şirkətinin 53%-i əvvəlki ilə nisbətən daha aşağı mənfəət əldə edib.  

Baffet bu inkişafı əsasən ABŞ xəzinə istiqrazlarının daha yüksək gəlirlilik səviyyəsi və "Geico" avtomobil sığorta şirkətində müşahidə olunan irəliləyişlə əlaqələndirib. "Geico" sığorta tariflərinin artırılması və daha sərt sığorta siyasəti hesabına mənfəət əldə edib, çünki avtomobil qəza zərərlərinin səviyyəsi azalıb.  

2024-cü ildə "Berkshire"in əməliyyat mənfəəti 27% artaraq 47,44 milyard dollara yüksəlib (2023-cü ildə bu rəqəm 37,35 milyard dollar idi).  

Dördüncü rübdə də rekord qeydə alınıb – əməliyyat mənfəəti 71% artaraq 14,53 milyard dollara çatıb. Bu, bir il əvvəlki 8,48 milyard dollarlıq göstəricidən xeyli yüksəkdir. Artım sığorta əməliyyatlarından və xarici valyuta məzənnələrindəki dəyişikliklərdən əldə olunmuş qazanc sayəsində baş verib.  

Hesabat dövründə ümumi xalis mənfəət 19,69 milyard dollar təşkil edib ki, bu da hər bir A sinif səhmi üçün 13,695 dollara bərabərdir. Bu artım, əsasən, "Berkshire"in "Apple", "American Express" və digər səhmlərdəki sərmayələrinin dəyərinin yüksəlməsi ilə əlaqədardır. İlin yekununda isə şirkətin xalis mənfəəti 89 milyard dollar olub.  

Baffet bildirir ki, xalis gəlirlər investisiya aktivlərinin satılmadan qiymət dəyişikliyini də əks etdirdiyi üçün yanıltıcı ola bilər.  

2024-cü ildə "Berkshire"in nağd pul ehtiyatının artımı, əsasən, şirkətin 143,4 milyard dollar dəyərində səhmlər satması ilə bağlı olub. Bu satışa "Apple" səhmlərinin 62%-i və "Bank of America"dakı payının üçdə biri daxildir.  

Eyni zamanda, "Berkshire" 2024-cü ildə öz səhmlərinin geri alınmasına cəmi 2,9 milyard dollar xərcləyib və 10 fevral tarixinə qədər, ötən ilin may ayından bəri heç bir geri alış həyata keçirməyib.  

Şirkətin tərkibinə "BNSF" dəmiryolu, sənaye hissələri və kimya sənayesi müəssisələri, iri daşınmaz əmlak brokerliyi, eləcə də "Dairy Queen" dondurmaları, "Fruit of the Loom" alt geyimləri və "See’s" konfetləri kimi pərakəndə satış markaları daxildir.  

Rəhim