İlon Maskın Donald Trampa yaxınlığı "X" platformasına fayda verir. ABŞ seçkiləri sosial media nəhəngi üçün yeni bir dönüş nöqtəsi oldu.

Valyuta.Az xəbər verir ki, bu barədə "Bloomberg" yazıb.

Agentlikdə yayımlanan yeni hesabatda bildirilir ki, İlon Mask hazırda sosial media platforması "X" üçün 44 milyard dollarlıq dəyər qiymətləndirməsi ilə investor axtarır. Bu məbləğ tanış gəlirsə, təəccüblənməyin - çünki Mask 2022-ci ilin oktyabrında o zaman "Twitter" adlanan platformanı eyni qiymətə satın almışdı.

Mask "X"i aldıqdan sonra platformanın gəlirləri demək olar ki, yarıya düşüb. Yəni milyardlarla dollarlıq zərərdən söhbət gedir. Görünən odur ki, Mask və onunla birlikdə sərmayə qoyan investorlar bu alış üçün həddindən artıq pul ödəyiblər. Məsələn, "X"in investorlarından biri olan "Fidelity" 2023-cü ilin sentyabrında platformaya qoyduğu sərmayənin dəyərinin Maskşn alış etdiyi dövrə nisbətən 79% azaldığını açıqlamışdı.

Lakin ABŞ prezident seçkiləri bu mənzərəni dəyişdirib. Mask açıq şəkildə Trampa dəstək verib və Respublikaçı namizədin kampaniyasını dəstəkləmək üçün yüz milyonlarla dollarlıq bir siyasi fəaliyyət komitəsi (PAC) qurub. Tramp seçkidə qalib gəldikdən sonra isə Mask bu dəstəyinin qarşılığını alıb - o, federal xərclər üzərində ciddi təsir gücünə malik olan Hökumət Effektivliyi Departamentinin (DOGE) rəhbəri təyin edilib.

Maskın sahibi olduğu "Tesla" və "Space"X" illərdir ABŞ hökumətindən milyardlarla dollarlıq subsidiyalar və müqavilələr alır. Lakin Trampın qalibiyyəti onun biznes imperiyasına bundan da böyük üstünlüklər qazandırır.

Maskın "X"i satın almasından sonra platforma məzmun siyasəti ilə bağlı problemlər və onun qalmaqallı açıqlamaları səbəbilə reklam gəlirlərində ciddi itkilər yaşayıb. Lakin seçkidən sonra vəziyyət dəyişməyə başlayıb. Bəzi böyük reklam verənlər "X"ə qayıtmaq siqnalları verirlər. Məsələn, "Apple" illər sonra ilk dəfə "X"də reklam yerləşdirib.

Bundan əlavə, "X"ə sərmayə qoymuş və əlindəki borcları satmaqda çətinlik çəkən bəzi investorlar nəhayət çıxış yolu tapa biliblər. "Bloomberg" bildirir ki, bu investorlar heç bir maliyyə itkisi olmadan milyardlarla dollarlıq borclarını satmağa nail olublar.

Mask hazırda "X"də maliyyə əməliyyatlarını aktivləşdirməyə və öz süni intellekt şirkəti "xAI"ın "Grok" çat-botunu platformaya inteqrasiya etməyə hazırlaşır. Bütün bu addımlarla yanaşı, şirkət hələ də 44 milyard dollarlıq dəyər qiymətləndirməsi ilə fond toplamaya çalışır.

Trampın qələbəsi sayəsində Mask artıq bu sərmayəni toplamaq üçün daha güclü mövqedədir. ABŞ-də siyasi dəyişikliklər və Maskın Tramp administrasiyası ilə yaxın əlaqələri onun "X"in dəyərini bərpa etmək üçün yeni fürsətlər əldə etməsinə şərait yarada bilər.

© Qaynarinfo