Meksikanın dövlət başçısı Klaudia Şeinbaum "Google"un Meksika körfəzinin adını Amerika körfəzi olaraq dəyişdirməsinə qarşı hüquqi addımlar atmağı düşündüyünü bildirib. 

Valyuta.az xəbər verir ki, bu dəyişiklik, ABŞ-ın keçmiş prezidenti Donald Trampın bölgənin adını dəyişdirmə cəhdindən qaynaqlanır.

"Google" bu yeniliyin yalnız müəyyən bir coğrafi bölgə ilə məhdudlaşacağını açıqlasa da, dünyanın müxtəlif yerlərində istifadəçilər körfəzin adının Amerika körfəzi olaraq dəyişdirildiyini müşahidə edib.

Şeinbaum çıxışında Trampın bu qərarının yalnız siyasi deyil, həm də coğrafi baxımdan yurisdiksiya ilə məhdud olduğunu vurğulayıb. O qeyd edib ki, Meksika körfəzinin böyük bir hissəsi Meksikanın hüquqi nəzarəti altında olduğundan, ABŞ-ın bu adı dəyişdirməsi yalnız öz sahil sularına şamil edilə bilər.

"Associated Press"in məlumatına görə, mətbuat konfransında danışan Şeinbaum "Bizim kontinental şelf üzərində suverenliyimiz var" deyib və əlavə edib: "Tramp körfəzin yalnız ABŞ ərazisinə düşən hissəsinin adını dəyişə bilər, lakin bütün körfəzin adını qlobal səviyyədə dəyişdirməyə səlahiyyəti yoxdur".

Meksika körfəzi adı ilk dəfə 1607-ci ildə işlədilib - bu, ABŞ-ın qurulmasından 169 il əvvələ təsadüf edir. Dörd əsrdir beynəlxalq səviyyədə tanınan bu adın dəyişdirilməsinin riskli ola biləcəyini bildirən Şeinbaum, Meksikanın ilk konstitusiyasının öncülü olan Apatsinqan konstitusiyasında ABŞ ərazisinin "Meksika Amerikası" kimi qeyd edildiyini də xatırladıb.

"Google" məsələyə dair açıqlamasında bildirib: "İki həftə əvvəl elan etdiyimiz və uzun müddətdir tətbiq etdiyimiz qaydalara uyğun olaraq, bu yeniliyi tətbiq etməyə başlamışıq. ABŞ-da "Google Maps" istifadə edənlər "Amerika körfəzi" adını, Meksikadakı istifadəçilər isə "Meksika körfəzi" adını görəcək. Digər istifadəçilər isə hər iki adı görə biləcək".

Paşa Məmmədli