“Apple”, Apple TV tətbiqini nəhayət “Android” cihazlara da təqdim etdi.

Valyuta.az xəbər verir ki, artıq “Android” istifadəçiləri Apple TV+ da daxil olmaqla bir çox məzmuna bu tətbiq vasitəsilə rahatlıqla çıxış əldə edəcəklər.

Apple TV+, məşhur filmlər və seriallar platforması olsa da, indiyə qədər yalnız “Apple” ekosistemində və məhdud sayda cihazda əlçatan idi. Lakin bu vəziyyət dəyişdi və “Android” istifadəçiləri üçün də tətbiq istifadəyə verildi.

“Android” istifadəçiləri üçün geniş imkanlar

Yeni tətbiq sayəsində “Android” istifadəçiləri Apple TV+, film və serial kirayələmək və satın almaq, MLS Season Pass kimi bir çox xidmətə çıxış əldə edəcəklər. Bununla yanaşı, qeyd etmək lazımdır ki, Apple TV+ hələ də bəzi ölkələrdə, o cümlədən Türkiyədə aktiv deyil.

Bütün “Android” cihazlardan əlçatan olacaq

Apple, daha əvvəl Google TV üçün bir versiya təqdim etmişdi, lakin bu dəfə tətbiq daha geniş “Android” cihazları üçün əlçatan olub. İstifadəçilər smartfonlardan planşetlərə qədər hər növ “Android” cihazından Apple TV tətbiqinə daxil ola biləcəklər.

Bundan əlavə, Apple TV+ xidmətinin “Google Play” vasitəsilə əldə edilə biləcəyi də bildirilib. Əvvəllər yalnız Google TV üzərindən mövcud olan xidmət üçün bir Apple TV+ hesabına ehtiyac var idi, lakin yeni tətbiqlə bu məhdudiyyət də aradan qaldırılıb. Artıq istifadəçilər birbaşa tətbiqdən “Apple” hesabı yarada biləcəklər.

Bu yeniliklə “Apple”, “Android” istifadəçiləri üçün öz ekosistemini daha da əlçatan hala gətirmiş olur. Tətbiqin “Google Play” vasitəsilə yüklənə biləcəyi və “Android” istifadəçilərinə tam funksionallıq təqdim edəcəyi qeyd edilir.

Sərvanə Rəmixanova