Bu il Şəki-Zaqatala Regional Təhsil İdarəsinin tabeliyində fəaliyyət göstərən və qəzalı vəziyyətdə olan 2 məktəb binasının sökülərək yenidən tikilməsi, 100-dən çox təhsil müəssisəsində isə təmir işlərinin aparılması nəzərdə tutulur.

Bu barədə Regional Təhsil İdarəsinin məsul əməkdaşı Mahal Məmmədov məlumat verib.

Qurumun əməkdaşı bildirib ki, bölgədə fəaliyyət göstərən ümumtəhsil müəssisələrinin maddi-texniki bazasının gücləndirilməsi, müasir avadanlıqlarla təmin edilməsi, yeni məktəb binalarının inşası və mövcud binaların əsaslı təmiri regional idarənin əsas prioritetlərindəndir. Hazırda idarənin tabeliyində olan Şəki şəhər 18 nömrəli tam orta məktəbin binası sökülərək yerində 720 şagird yerlik yeni bina inşa edilir. Bundan əlavə, Şəki şəhər 20 nömrəli tam orta məktəbdə, həmçinin Şəkinin Cəfərabad kənd tam orta və Küdürlü kənd ümumi orta məktəblərində, Qax rayonunun Marsan kənd tam orta məktəbində təmir işləri aparılır.

Mahal Məmmədovun məlumatına görə, son iki ildə Regional Təhsil İdarəsinin tabeliyində fəaliyyət göstərən 100-dən çox təhsil müəssisəsində cari, 1 məktəbdə əsaslı təmir işləri aparılıb, 8 məktəb binası sökülərək yenidən tikilib.