ABŞ-li qəhvə şəbəkəsi "Starbucks" öz maliyyə hesabatını açıqlayıb.  

Valyuta.Az xəbər verir ki, hesabata əsasən, "Starbucks"ın qlobal müqayisəli mağaza satışları 4% azalıb.  

Şirkətin Şimali Amerika və ABŞ-də, eləcə də beynəlxalq bazarlardakı müqayisəli mağaza satışları da 4% geriləyib. Çində isə satışlar 6% azalıb.  

29 dekabr 2024-cü ildə başa çatan üç aylıq dövrdə "Starbucks"ın gəliri əvvəlki ilin eyni dövrü ilə müqayisədə dəyişməyərək 9,4 milyard dollar səviyyəsində qalıb. Şirkətin bir səhmlik mənfəəti isə 2023-cü ilin eyni dövrü ilə müqayisədə 23% azalaraq 69 sentə düşüb.  

Şirkətin gəliri və mənfəəti azalsa da, bu dövrdə bazar gözləntilərini üstələyib.  

"Starbucks"a dönüş cəhdlərimiz müsbət qarşılandı

"Starbucks"ın baş icraçı direktoru (CEO) Brayan Nikoll (Brian Niccol) maliyyə nəticələrinə dair açıqlamasında, "Starbucks"a dönüş strategiyasının ilk rübündə olmalarına baxmayaraq, sürətlə hərəkət etdiklərini və müsbət nəticələr əldə etdiklərini bildirib.  

Nikoll, "Bu strategiyanın əsas problemlərimizi həll etmək, brendimizə inamı bərpa etmək və biznesimizi uzunmüddətli, dayanıqlı inkişafa yönəltmək üçün vacib olduğuna inanırıq", – deyə qeyd edib.  

Şirkətin maliyyə direktoru (CFO) Reyçel Ruqqeri (Rachel Ruggeri) isə "Starbucks"a dönüş strategiyasının hələ başlanğıc mərhələsində olduqlarını və qarşıda hələ çox işin olduğunu vurğulayıb.  

Ruqqeri, səhmdar dəyərinə üstünlük verməyə davam edəcəklərini və biznesi gücləndirərkən proqnozlaşdırıla bilən kapital qaytarışı təmin edəcəklərini bildirib.  

Boykotların şirkətə təsiri

İsrailin Qəzzəyə hücumları səbəbindən etiraz və boykot kampaniyalarına məruz qalan şirkətlərdən biri olan "Starbucks"ın maliyyə nəticələri son dörd rübdə mənfi təsirlənib.  

Qəhvə şəbəkəsi 2023-cü ilin oktyabr-dekabr dövründə, qismən Orta Şərqdəki mağazalarda satışların aşağı düşməsi səbəbindən, illik satış proqnozunu azaldıb.  

Şirkətin gəliri ötən ilin yanvar-mart dövründə 2% azalarkən, qlobal satışları 4% geriləməklə 2020-ci ilin sonundan bəri ilk dəfə eniş göstərib.  

"Starbucks"ın qlobal satışları 2023-cü ilin aprel-iyun dövründə 3%, iyul-sentyabr dövründə isə 7% azalıb.  

Rəhim