“Google” süni intellekt (Sİ) texnologiyasına dair cəmiyyətin maarifləndirilməsi və bu sahədə siyasətlərin formalaşdırılmasına dəstək məqsədilə yeni təhsil proqramları hazırlayır. 

Bu barədə Valyuta.az “Alphabet” şirkətinin qlobal məsələlər üzrə prezidenti Kent Uokerin açıqlamalarına istinadən xəbər verir.

“Daha çox insanı və təşkilatı, o cümlədən hökumətləri süni intellektlə tanış etmək və bu texnologiyanın alətlərindən istifadəni öyrətmək süni intellekt siyasətinin təkmilləşdirilməsinə və yeni imkanların yaranmasına yol açır,” – deyə Uoker bildirib.

Şirkət rəhbərliyi hesab edir ki, bu təşəbbüs həm də süni intellektin cəmiyyətə təsiri ilə bağlı mövqeyi formalaşdırmaq baxımından əhəmiyyətlidir. Xüsusilə, bu texnologiyanın kütləvi ixtisarlarla nəticələnə biləcəyinə dair narahatlıqların fonunda “Google” uzunmüddətli perspektivdə yalnız az sayda peşənin tamamilə süni intellekt tərəfindən əvəz ediləcəyini, lakin əksər sahələrdə texnologiyanın peşələrə qismən inteqrasiya olunacağını bildirir.

“Google” texniki sahələrdə karyera yüksəlişini dəstəkləmək məqsədilə işçilərə məlumat analitikası və İT dəstəyi üzrə təlimlər keçən “Grow with Google” proqramını genişləndirməyi planlaşdırır. Şirkətin məlumatına əsasən, 2024-cü ilin sonuna qədər bu proqramın məzunlarının sayı 1 milyona çatıb.

Şirkət həmçinin dövlət-özəl tərəfdaşlıq çərçivəsində layihələr inkişaf etdirməyə çalışır. Kent Uokerin sözlərinə görə, bu istiqamətdə “Skilled Trades and Readiness” proqramı ön plandadır və şirkət kollec təhsil müəssisələri ilə əməkdaşlıq edir. O əlavə edib ki, bu proqram çərçivəsində süni intellekt təlimləri də daxil edilir.

Qeyd edək ki, “Google” un bu təlim təşəbbüsləri ABŞ Ədliyyə Nazirliyinin və digər tənzimləyici qurumların korporasiya və süni intellekt sahəsinə artan təzyiqlərinin fonunda həyata keçirilir. Nazirlik şirkəti “Google” un məhsulları, o cümlədən “Chrome”, “Play” və “Android” platformalarından istifadə edərək axtarış və Sİ sahələrində rəqabət üstünlüyü qazanmağa çalışmaqda ittiham edir.

Maya Hüseynova