Azərbaycan Mərkəzi Bankı (AMB) 2024-cü ilin may ayında pul-kredit siyasətində yumşaldılma dövrünü dayandırıb və uçot dərəcəsinin əlavə olaraq azaldılması gözlənilmir.

Valyuta.Az xəbər verir ki, bu barədə “Fitch Ratings” beynəlxalq reytinq agentliyinin Azərbaycanın kredit reytinqinin təsdiqlənməsi haqqında hesabatında bildirilir.

Agentliyin qiymətləndirmələrinə görə, AMB xarici bazarlardakı qeyri-müəyyənlik, ölkə daxilində dövlət tərəfindən tənzimlənən malların qiymətlərinin artması, daxili tələbatla bağlı vəziyyət kimi amilləri nəzərə alaraq uçot dərəcəsini hazırkı səviyyədə (7,25 %) saxlayacaq.

“Fitch”in analitikləri Azərbaycanda inflyasiyanın bir qədər sürətləndiyini qeyd edirlər. "İnflyasiya dekabrda illik 4,9 %-ə yüksəlib, lakin Mərkəzi Bankın hədəf diapazonu daxilində (4 %±2 %) qalır. 2025-ci ildə orta illik inflyasiya 2024-cü ildə gözlənilən 2,1 %-lə müqayisədə 5,3 %-ə çatacaq ki, bu da “BBB” reytinqli ölkələr üçün proqnozlaşdırılan 3 %-dən yüksəkdir", - agentlik bildirir.

Qeyd edək ki, Azərbaycan Mərkəzi Bankı son beş iclasında uçot dərəcəsinin 7,25 % səviyyəsində saxlanılması ilə bağlı qərar qəbul edib. Niderlandın ən böyük bank qrupu olan “ING Group” hesab edir ki, AMB 2025-ci ildə uçot dərəcəsini 7,25 % səviyyəsində saxlayacaq, 2026-cı ildə isə 7,75 %-ə yüksəldə bilər.

Mərkəzi Bankın uçot dərəcəsi məsələsinə həsr olunmuş növbəti iclası 2025-ci il yanvarın 22-nə planlaşdırılır.

İqtisadiyyat Nazirliyi Azərbaycanda orta illik inflyasiyanı 4,6 % səviyyəsində proqnozlaşdırır. AMB cari il üçün illik inflyasiyanı 5,8 % səviyyəsində gözləyir. 2024-cü ildə Azərbaycanda orta illik inflyasiya 2,2 % təşkil edib.

© Report