"Azərbaycan Sənaye Bankı" (ASB) 2024-cü il üzrə maliyyə hesabatlarını açıqlayıb.

Valyuta.az banka istinadən xəbər verir ki, ötən il ASB-nin xalis mənfəəti 2023-cü illə müqayisədə 26% və ya 1,33 milyon manat artaraq 6,45 milyon manat təşkil edib. 2023-cü ildə bank 5,12 milyon manat xalis mənfəət əldə etmişdi.

Hesabat dövründə bankın faiz gəlirləri 8.6% artaraq 36,04 milyon manat, faiz xərcləri isə 6.8% artaraq 28,27 milyon manat təşkil edib. Bu dövrdə bankın qeyri-faiz gəlirləri 15,77 milyon manat (illik müqayisədə 28% çox), qeyri-faiz xərcləri isə 25,83 milyon manata (illik müqayisədə 16.6% çox) bərabər olub. Beləliklə, bank bu dövrdə 7,72 milyon manat əməliyyat mənfəəti əldə edib ki, bu da 2023-cü ilə nisbətən 23.6% çoxdur.

Ötən il bankın aktivləri 4% və ya 30 milyon manat artaraq 779,25 milyon manat təşkil edib. Bu dövrdə bankın kredit portfeli (müştərilərə verilmiş kreditlər) 15.5% və ya 39.7 milyon manat artaraq 296,18 milyon manata çatıb.

Bu dövrdə "Azərbaycan Sənaye Bankı"nın cəmi öhdəlikləri 658,38 milyon manat təşkil edib ki, bu da illik müqayisədə 3.7% və ya 23.5 milyon manat çoxdur. Hesabat dövründə bankın depozit portfeli də 1.6% və ya 7.3 milyon manat artaraq 465,91 milyon manata yüksəlib.

Fiziki şəxslərin depozitləri əvvəlki illə müqayisədə 5.5% və ya 17.1 milyon manat azalaraq 293,04 milyon manat, hüquqi şəxslərin depozitləri isə 16.4% və ya 24.4 milyon manat artaraq 172,87 milyon manat təşkil edib.

2025-ci il yanvar ayının 1-nə ASB-nin cəmi kapitalı ötən ilin müvafiq dövrü ilə müqayisədə 5.7% və ya 6,55 milyon manat artaraq 120,87 milyon manat təşkil edib.