"OpenAI"nin baş direktoru Sam Altman bazar günü bildirib ki, şirkət aylıq 200 dollar qiymətində olan “ChatGPT Pro” planından gözləniləndən daha çox istifadə edildiyi üçün hazırda zərər edir.

“Qiyməti şəxsən mən müəyyən etdim və düşünürdüm ki, müəyyən qədər gəlir əldə edəcəyik.”

Valyuta.Az xəbər verir ki, bunu Altman “X” sosial şəbəkəsindəki paylaşımında yazıb.

Keçən ilin sonunda istifadəyə verilən “ChatGPT Pro” planı "OpenAI"nin “o1” adlı “məntiqi analiz” modelinin təkmilləşdirilmiş versiyasına, “o1 pro” rejiminə çıxış imkanı yaradır və “Sora” video generatoru daxil olmaqla, şirkətin digər bir neçə alətindəki sürət məhdudiyyətlərini aradan qaldırır.

"OpenAI" bu günə qədər təxminən 20 milyard dollar vəsait toplamasına baxmayaraq, hələ də gəlir əldə etmir. Bildirilir ki, keçən il şirkətin gəliri 3,7 milyard dollar olsa da, 5 milyard dollarlıq zərər gözlənilib.

Bu maliyyə itkisi əsasən işçi heyəti, ofis xərcləri və süni intellektin təlim infrastrukturu kimi xərclərlə bağlıdır. Bir vaxtlar “ChatGPT”nin gündəlik xərci təxminən 700.000 dollar təşkil edirdi.

Son vaxtlar "OpenAI" yeni investisiyaları cəlb etmək məqsədilə korporativ yenidənqurma planlarına hazırlaşarkən, “gözlədiyindən daha çox kapitala ehtiyac duyduğunu” etiraf edib. Şirkətin gəlirli olmasını təmin etmək üçün müxtəlif abunə səviyyələrinin qiymətlərini artırmağı nəzərdən keçirdiyi bildirilir. "OpenAI" optimist şəkildə proqnozlaşdırır ki, 2029-cu ilə qədər gəliri 100 milyard dollara çatacaq və bu, hazırda “Nestlé”nin illik satışlarına bərabərdir.  

Rəhim