Qızıl, Rusiya-Ukrayna münaqişəsinin gərginləşməsi səbəbindən təhlükəsiz liman kimi cazibəsinin artması ilə ötən ilin oktyabrından bəri ən böyük həftəlik artımını nümayiş etdirməyə hazırlaşır. Ticarətçilər, eyni zamanda, ABŞ Federal Ehtiyat Sisteminin (FED) əlavə faiz endirimi ehtimallarını da qiymətləndirirlər.

Valyuta.Az "Bloomberg"ə istinadən xəbər verir ki, Sinqapur vaxtı ilə saat 14:37-də qızılın bir unsiyasının qiyməti 0,7% artaraq 2 687,71 ABŞ dollarına çatıb. Bu artım, Ukraynanın Rusiyanın Dnipro şəhərinə qarşı yeni tip ballistik raket istifadəsini elan etməsi ilə əlaqələndirilir. Geopolitik gərginliklərin artması, adətən, investorların qızıla yönəlməsinə səbəb olur.

FED-in Çikaqo Bankının prezidenti Austan Qulsbin (Austan Goolsbee), faiz dərəcələrinin “xeyli aşağı” enəcəyini və inflyasiyanın mərkəzi bankın hədəfinə yaxınlaşdığına əmin olduğunu bildirib. Aşağı faiz dərəcələri, faiz gəliri olmayan qızıl üçün əlverişli şərait yaradır.

Bu il ərzində qızılın qiyməti 30% yüksəlib. Bu artımı əsasən mərkəzi bankların güclü alışı, təhlükəsiz liman tələbatının artması və FED-in faiz dərəcələrini azaltma dövrü dəstəkləyib. Analitiklər, o cümlədən "Goldman Sachs Group Inc." və "UBS Group AG", 2025-ci ildə qızılın yeni rekordlara çatacağını gözləyərək optimist proqnozlar veriblər.

Məlumatlara əsasən, ABŞ-ın qarışıq əmək bazarı göstəricilərinə baxmayaraq, dolların möhkəmlənməsi qızılın qiymət artımını dayandıra bilməyib. Daha güclü dollar, adətən, əmtəələrin qiymətini digər valyuta istifadəçiləri üçün daha bahalı edir.

Bu həftə ərzində spot qızılın qiyməti 4,9% artaraq 2023-cü ilin oktyabrından bəri ən yaxşı performansını göstərib. "Bloomberg Dollar Spot Index" isə son iki günlük artımdan sonra demək olar ki, dəyişməz qalıb. Gümüşün bir unsiyasının qiyməti 0,9% artaraq 31,06 ABŞ dollarına, palladiumun qiyməti isə 0,9% yüksələrək 1 040,85 ABŞ dollarına çatıb. Platin isə sabit qiymətini qoruyub.

Rəhim