"Hyundai Motor" çərşənbə günü ilk üç sıra oturacaqlı elektrik SUV modelini təqdim edərək, iri ailə avtomobilləri bazarına daxil oldu. 

Valyuta.Az-ın verdiyi xəbərə görə, bu bazar, qlobal avtomobil istehsalçılarının gələcəkdə böyük gəlir mənbəyi olaraq gördüyü seqmentlərdən biridir.  

Koreya avtomobil istehsalçısının verdiyi açıqlamaya görə, "Hyundai"ın "IONIQ 9" modeli gələn ilin əvvəlində ABŞ və Koreyada satışa çıxarılacaq və 300 mildən çox məsafə qət etmək qabiliyyətinə sahib olacaq. Şirkət bu modelin Avropa və digər bazarlarda da təqdim ediləcəyini bildirib.  

Üç sıra oturacaqlı SUV modelləri hazırda miniven və universal avtomobilləri əvəz edərək, həm uşaqlar və dostları şəhərdə gəzdirmək, həm də çoxsaylı sərnişin və baqajla uzun səfərlər üçün ideal seçimdir.  

Elektrikli avtomobillər (EV) hazırda əksər hallarda zərər gətirsə də, batareya xərclərinin azalması ilə istehsalçılar üçün gəlirli məhsula çevrilə bilər. Erkən təqdimatlar isə markalara inkişaf edən bu seqmentdə rəqabət üstünlüyü qazandırır.  

"Lucid", "General Motors"un "Cadillac" markası, "Volvo" və "VinFast" kimi şirkətlər artıq üç sıra oturacaqlı elektrik SUV modellərini bazara çıxarıb. "Hyundai"ın tərəfdaşı olan "Kia" isə öz versiyasını təqdim edib.  

"Bu seqment benzinli avtomobil bazarında çox əhəmiyyətlidir," deyə "AutoForecast Solutions" şirkətinin vitse-prezidenti Sem Fiorani (Sam Fiorani) bildirib. "Lakin əsas çətinlik ondan ibarətdir ki, bu avtomobillər böyükdür və üç sıra oturacaq üçün batareya sistemini uyğun dizayn etmək ciddi texniki səylər tələb edir."  

Bununla yanaşı, iri batareyalar uzun səfərlər zamanı enerji doldurma ehtiyacını tam aradan qaldıra bilmir.  

Fiorani qeyd edib ki, avtomobil istehsalçıları sadiq müştəriləri məmnun saxlamaq üçün bu seqmentə daxil olmalıdır:

"Əgər gözlənilən sahədə mövcud deyilsinizsə, müştərilər başqa markalara üz tutacaq. Mövcud müştərini qorumaq isə yeni müştəri qazanmaqdan daha asandır."  

Hyundai "IONIQ 9" modelinin qiymətini hələ açıqlamayıb. 

Hyundai 2030-cu ilə qədər 23 tam elektrik avtomobili modeli təqdim etməyi planlaşdırır. Corciyada istehsal ediləcək "IONIQ 9" yüksək güclü enerji doldurma stansiyalarında 10%-dən 80%-ə qədər enerji doldurmanı cəmi 24 dəqiqəyə tamamlayacaq və "Tesla"nın Supercharger şəbəkəsi ilə uyğun olacaq.  

Aydın