"The Options Clearing Corporation" ("OCC") spot Bitcoin birja investisiya fondları ("Bitcoin ETF") üçün opsiyaların ticarətinə başlamaq üçün hazırlıqlarını tamamladığını açıqlayıb. 

Valyuta.Az xəbər verir ki, bu qərar, ABŞ Əmtəə Fyuçers Ticarət Komissiyasının (CFTC) bu məhsulların ABŞ Kapital Bazarları Komissiyasının (SEC) nəzarətində olduğunu bildirməsindən sonra verilib.

"OCC" bildirib ki, "BlackRock iShares Bitcoin Trust" (IBIT) daxil olmaqla, bu ETF-lər üçün opsiyaların ticarəti və risk idarəetməsi onların nəzarətində olacaq. "Nasdaq"da investisiya məhsulları üzrə rəhbər Alison Hennessy, IBIT opsiyalarının 19 noyabrdan etibarən ticarətə açılacağını təsdiqləyib.

Yeni investisiya imkanları

"Nasdaq"da təqdim edilən bu opsiyalar, yanvarda təsdiqlənən 11 spot Bitcoin ETF-inin bir hissəsidir. Bu təsdiqlərdən sonra ETF-lər 500 milyard dollardan çox ticarət dövriyyəsi yaradıb. "BlackRock"un IBIT məhsulu isə bu dövriyyənin böyük hissəsini təşkil edir. ETF analitiki Erik Balçunas (Eric Balchunas) bu addımı "sadəcə vaxt məsələsi" kimi dəyərləndirib.

Opsiyaların investorlar üçün faydası

Opsiyalar həm fərdi, həm də iri investorlar üçün yeni imkanlar təqdim edir. Fərdi investorlar üçün opsiyalar spekulyativ qazanc vasitəsi kimi istifadə olunsa da, iri investorlar üçün mövqelərini qorumaq məqsədilə əhəmiyyətlidir. 

Analitiklər hesab edirlər ki, Bitcoin bazarında geniş investor bazası olduğu üçün bu opsiyalar daha çox aktivlik yaradacaq. Bu isə kripto bazarının daha etibarlı görünməsinə və institusional investorların diqqətini çəkməsinə səbəb ola bilər.

Bitcoin üçün yeni mərhələ

Spot Bitcoin ETF opsiyaları bazara daha çox likvidlik gətirə və dəyişkənliyi azalda bilər. Bu addım, həmçinin, Bitcoinin daha ciddi maliyyə aləti kimi qəbul edilməsinə kömək edəcək. 

Bu yenilik, kriptovalyuta bazarını daha geniş maliyyə məhsulları ilə zənginləşdirə bilər. Beləliklə, ETF-lər və opsiyalar Bitcoinin qlobal maliyyə sistemindəki mövqeyini daha da gücləndirəcək.

Aydın