"Avro bölgəsi"ndə investor etimadı noyabr ayında iqtisadi qeyri-müəyyənliklərin artması ilə əlaqədar xeyli aşağı düşüb.

Almaniya mərkəzli "Avropa İqtisadi Araşdırmalar Mərkəzi" (ZEW) institusional investorlar və bazar mütəxəssislərinin gələcəyə dair gözləntilərini ölçən ZEW İqtisadi Etimad İndeksinin noyabr ayı nəticələrini açıqlayıb.

Valyuta.az açıqlanan nəticələrə əsasən xəbər verir ki, "Avro bölgəsi"ndə oktyabrda 20,1 bal olan ZEW İqtisadi Etimad İndeksi noyabrda 12,5 bala enib. Beləliklə, indeks əvvəlki ayla müqayisədə 7,6 bal azalıb.

Bazar gözləntiləri indeksin 20,5 bal səviyyəsində olacağı yönündə idi. Açıqlanan göstəricilərin bazar gözləntilərindən xeyli aşağı olması diqqət çəkib.

İndeksdəki azalmanın, Donald Trampın ABŞ-ın 47-ci prezidenti seçilməsi və Almaniyada koalisiya hökumətindəki böhranın "Avro bölgəsi"nin iqtisadi görünüşünə dair qeyri-müəyyənlikləri artırması ilə əlaqədar olduğu bildirilir.

Digər tərəfdən "Avro bölgəsi" vəziyyət indeksi də 3 bal azalaraq mənfi 43,8 olub.

İZAHAT

Avro bölgəsi - "Avro bölgəsi" (və ya "Avrozon") Avropa İttifaqına daxil olan və ortaq valyuta kimi avrodan istifadə edən ölkələr qrupudur.

Rəhim