İrlandiyalı aviaşirkət "Ryanair" bazar ertəsi açıqladığı hesabata əsasən, bilet qiymətlərinin azalması ilə əlaqədar II rübdə xalis gəlirinin azaldığını bildirib.

Valyuta.az xəbər verir ki, "Ryanair"-in II rübdəki vergidən sonrakı xalis gəliri ötən ilin eyni dövrü ilə müqayisədə 6 % və ya 200 milyon avro azalaraq 1,4 milyard avroya (1,6 milyard dollar) düşüb.

Maliyyə ilinin ilk altı ayında isə xalis gəlir 18 % azalaraq 1,8 milyard avro təşkil edib.

Şirkətdən bildirilib ki, ilin birinci yarısında sərnişin dövriyyəsindəki güclü artım II rübdə 7 % ucuzlaşan aviabiletlərlə kompensasiya olunub.

"Ryanair"-in baş direktoru Maykl Oliri Ukrayna və Orta Şərqdəki münaqişələrdən irəli gələn risklərə və "Boeing" təyyarələrinin təhvillərindəki gecikmələrə işarə edərək, tam illik nəticələrin müsbət olmasının bu cür mənfi halların aradan qaldırılmasından asılı olduğunu vurğulayıb.

"Boeing" təhvillərindəki gecikmələr ötən il "Ryanair"-in nəticələrinə və sərnişin axınına mənfi təsir göstərib.

Oliri həmçinin əlavə edib ki, "Boeing" rəhbərliyi ilə təyyarə təhvillərini sürətləndirmək üçün danışıqlar aparmağımıza baxmayaraq, təhvillərdə gecikmə riski yüksək olaraq qalır. Ona görə də, "Ryanair"in 2026-cı maliyyə ili üçün sərnişin axını hədəfini 215 milyondan 210 milyona endirməyin daha məntiqli olduğuna inanırıq.

Rəhim