"Samsung Electronics" üçüncü rüb üçün ilkin maliyyə nəticələrini təqdim edib ki, bu da analitiklərin gözləntilərindən və elektronika istehsalçısının özünün proqnozlarından nəzərəçarpacaq dərəcədə pis olub. 

Valyuta.az xəbər verir ki, Cənubi Koreya şirkəti qeyri-qənaətbəxş rüblük nəticələrə görə üzr istəyib.

Dünyanın ən böyük yaddaş çipi istehsalçısı tərəfindən bu gün, oktyabrın 8-də açıqlanan proqnozda deyilir ki, üçüncü rübdə əməliyyat mənfəəti təxminən 9,10 trilyon von (6,83 milyard dollar; bu, mümkün nəticələr diapazonunun median dəyəridir) təşkil edəcək. Beləliklə, keçən illə müqayisədə mənfəət 274% artacaq.

Lakin bu gün açıqlanan proqnoz analitiklərin proqnozlarından nəzərəçarpacaq dərəcədə pis olub. Beləliklə, LSEG tərəfindən sorğu edilən analitiklərin konsensus proqnozu 11,46 trilyon von (8,6 milyard dollar) təşkil edib. Analitiklərin fikrincə, "Samsung"un gəlirinin təxminən 82 trilyon von (61,5 milyard dollar) olacağı gözlənilirdi, lakin şirkət 79 trilyon von (59,3 milyard dollar) bölgədə gəlir gözlədiyini bildirib.

Bundan sonra cihaz həlləri bölməsinə rəhbərlik edən "Samsung" vitse-prezidenti Çunq Yonq Hyun həm korporativ işçilərdən, həm də investorlardan üzrxahlıq dərc edib: 

"Bu gün "Samsung Electronics" rəhbərliyi ilk növbədə sizdən üzr istəmək istəyir. Performansımız bazar gözləntilərinə cavab vermədiyi üçün şirkətimizin fundamental texnoloji rəqabət qabiliyyəti və gələcəyi ilə bağlı narahatlığımızı artırdıq. Çoxları "Samsung" böhranından danışır. Biz biznes rəhbərləri olaraq bütün bunlara cavabdehik”.

"Samsung"un hesabatında deyilir ki, aşağı performans "birdəfəlik xərclər və mənfi bazar şərtləri" ilə əlaqədardır, şirkət bunu mobil cihaz istehsalçılarının tələbinin azalması, eləcə də Çinli müştərilərin alışının köhnə avadanlıqlara keçməsi ilə əlaqələndirir. Eyni zamanda, Çunq Yonq Hyun bəyan edib ki, "Samsung" texnologiya yarışında liderliyini bərpa edəcək və bununla da bazarda rəqabətdə qalib gələcək və mövcud böhrandan çıxacaq.

Paşa Məmmədli