Artıq Azərbaycanda bir sıra banklarda əmanətlər üzrə faiz dərəcələri artırılıb. Belə ki, bəzi banklarda faiz gəliri müddətin sonu əldə etməklə: 1 aylıq - 7%, 3 aylıq - 8%, 6, 12 və 18 aylıq - 11%, ayın sonu əldə etməklə isə 3 aylıq - 7%, 6, 12 və 18 aylıq-10% məbləğində vəsait verilir. 
Bu, son illər ərzində ölkədə olmayan tendensiyadır.

Valyuta.az hazırda ölkədə yaranan bu tendensiyanın səbəbini öyrənməyə çalışıb.

Maliyyə eksperti Xalid Kərimli hesab edir ki, banklar 2, 6, 12, 18 aylıq məhsullar təqdim ediblər. Lakin hazırda əmanətlərə yüksək faiz verməklərinin səbəbi ölkədə milli valyutanın dəyərinin artmasıdır.

Onun sözlərinə görə, Mərkəzi Bank ötən il məcburi ehtiyat normasını milli valyutada depozitlər üzrə 4%-dən 5%-ə, xarici valyutada depozitlər üzrə isə 5%-dən 6%-ə qaldırıb: “Bu qanun bank sisteminin kredit vermək qabiliyyətinə təsir göstərməklə yanaşı, ölkədə bankların pulunun dəyərini artırıb”.

Ekspert qeyd edib ki, banklar daha çox yüksək faiz verməyə başlayıblar: “Bu prosesin ikinci tərəfi isə kreditlərin faiz dərəcələnin artmasıdır. Kredit faizləri artıb. Banklar bu faizlə pulu cəlb edib, daha yüksək faizlə satırlar”. 

“Digər məqam isə qısamüddətli vəsaitlərə yüksək faiz verilməsi müəyyən likvidlik problemi ilə də bağlı ola bilər. Yəni, sürətli pula da ehtiyacları ola bilər”, - deyə o bildirib. 

O, ölkədəki bankların vəziyyətinə diqqət çəkib: “Hazırda Azərbaycanda fəaliyyət göstərən banklar kifayət qədər stabildir, bir sıra bankların reytinqi artıb. Əvvəlki illərlə müqayisədə bankların vəziyyəti yaxşıdır. Banklar bazarın tələbatı olan sahələr üzrə məhsullar təqdim edirlər”.

Bu ilin yanvar-iyul aylarında Azərbaycanda fəaliyyət göstərən bankların aktivlərinin həcmləri 49 milyard 89 milyon manat olub. Bu, 2023-cü ilin 6 ayı ilə müqayisədə 9,3 % və ya 4 milyard 209 milyon manat çoxdur.

2023-cü ilin hesabat dövründə bankların aktivlərinin həcmi 44 milyard 880 milyon manat təşkil edib.

Nara