"iPhone 16 Pro"nun qiyməti, qiymət artımı ilə bağlı şayiələrə baxmayaraq, eyni qalacaq. 

Valyuta.az xəbər verir ki, bu barədə nüfuzlu insayder və "Bloomberg"in jurnalisti Mark Qurman X (keçmiş Twitter) sosial şəbəkəsindəki səhifəsində məlumat verib.

Mənbənin məlumatına görə, "iPhone 16 Pro" xəttinin başlanğıc qiyməti 999 dollar səviyyəsində qalacaq. Əvvəllər "TrendForce "analitikləri minimum yaddaş həcminin 128 GB-dan 256 GB-a qədər artması səbəbindən başlanğıc qiymətin 100 dollar artacağını proqnozlaşdırırdılar. Göründüyü kimi, qiymət artımı gözlənilmir, lakin Qurman "iPhone 16 Pro"da minimum yaddaş həcmində dəyişiklik olub-olmayacağını dəqiqləşdirməyib.

Qurmanın sözlərinə görə, "Apple" həmçinin ekran çərçivələrinin qalınlığını nəzərəçarpacaq dərəcədə azaldacaq və bütün yeni smartfonlar seriyasında batareyanın ömrünü əhəmiyyətli dərəcədə yaxşılaşdıracaq.

"iPhone 16"nın təqdimatı bu gün Baı vaxtı ilə saat 21:00-a planlaşdırılıb. "Apple"ın "iPhone 16", "iPhone 16 Plus", "iPhone 16 Pro" və "iPhone 16 Pro Max" modellərini təqdim edəcəyi gözlənilir. İlk ikisi sensorların şaquli düzülüşü ilə kamera blokunun yenilənmiş dizaynını alacaq, flaqman modellərdə isə müvafiq olaraq 6,1 və 6,7 düymdən 6,3 və 6,9 düymədək artırılmış ekranlar olacaq.

Paşa Məmmədli