"Samsung Galaxy Ring" smart üzüyünün sahibləri cihazın batareyasının ömrünün azalmasından şikayətləniblər. 

Valyuta.az xəbər verir ki, bu barədə "Sammobile" portalı məlumat yayıb.

"Samsung" iddia edir ki, üzük bir dəfə doldurulmaqla 7 günə qədər işləyə bilər. Bu da onu idman və sağlamlığın monitorinqi üçün rahat istifadə üçün əlverişli qadcetə çevirir. Bununla belə, bir çox istifadəçi batareyanın ömrünün demək olar ki, yarıya qədər azaldığını qeyd edir.

Əvvəlcə üzük 6 günə qədər enerji doldurmadan işləyə bilirdi, lakin qısa müddət istifadə etdikdən sonra bu rəqəm 3 günə düşüb. Onlayn çoxsaylı şikayətlərə əsasən, problem geniş yayılıb.

Ehtimal olunur ki, bu, proqram təminatının səhvi və ya enerji istehlakının optimallaşdırılması zərurəti ilə bağlıdır və bu, "Samsung"un gələcək proqram təminatı yeniləmələri ilə həll edilə bilər. Hələlik şirkət rəsmi yamaq buraxmayıb və vəziyyətlə bağlı şərh verməyib.

"Samsung Galaxy Ring" "Samsung Health" tətbiqinə inteqrasiya ilə yuxu, ürək döyüntüsü, fiziki fəaliyyət və sair kimi mühüm sağlamlıq göstəricilərini izləyən "Samsung"un ilk ağıllı üzükdür. Cihaz iyulun 19-da 339 dollara satışa çıxarılıb.

Paşa Məmmədli