“Naxçıvan Bank”ın bağlanmasının səbəbi kimi onun səhmdarlarının qərarı göstərilir. Belə ki, bu bankın maliyyə göstəriciləri qənaətbəxş olsa da, yəni likvid aktivləri kreditor öhdəliklərini üstələsə də, səhmdarlar onun bağlanmasına və BOKT-a (Bank Olmayan Kredit Təşkilatı) çevrilməsinə qərar verib. 

Valyuta.az-a danışan iqtisadçı ekspert Eldəniz Əmirov bildirdi ki, bir bankın BOKT-a çevrilməsi maraqlı qərardır. Çünki, adətən BOKT-lar banka çevrilmək istəyir:

“Hər hansı bankın səhmdarları BOKT-a çevrilmə qərarı alıblarsa, deməli, bank kimi fəaliyyət göstərməkdə müəyyən problemlər yaşanır. BOKT-lar əsasən kredit məsələləri ilə məşğul olurlar. Banklar isə daha geniş əmanət cəlb edir, bank hesablarını idarə edir, pul köçürmələri və s. həyata keçirir. Buna görə də, BOKT olaraq fəaliyyət göstərmək daha asandır. Amma konkret olaraq bir bankın BOKT-a çevrilməsinə birmənalı olaraq cavab vermək çox çətindir”.

Ekspert deyir ki, ümumiyyətlə, bankların sayının azalması bank sektorunda rəqabət mühiti üçün yaxşı heç nə vəd etmir:

“Düzdür, son bir neçə ildə bağlanan bankların maliyyə vəziyyəti elə idi ki, onsuz da bu bankların rəqabət mühiti üçün bir faydası yox idi. Amma yenə də hər hansı bankın bağlanması bu sektor üçün uğur deyil”.

Əvəz Həsənov