2024-cü ilin birinci yarısında Çindən Rusiyaya minik avtomobillərinin tədarükü pul ifadəsində 35,4% artaraq 6,2 milyard dollara çatıb.

HİT.az xəbər verir ki, birinci rübdə Çindən Rusiyaya 2,3 milyard dollar (+30,7% illik), ikinci rübdə isə 3,9 milyard dollar (+38,4%) dəyərində minik avtomobilləri idxal edilib. 

İyun ayında onların Rusiyaya tədarükünün həcmi may ayının nəticəsini 2% üstələyərək 1,36 milyard dollar təşkil edib və eyni rəqəmin 1,38 milyard dollar olduğu 2023-cü ilin noyabrından bəri ən yüksək göstərici olub.

Bundan əvvəl məlum idi ki, yaxın gələcəkdə Rusiyada Çin avtomobil markalarının sayı kəskin azalacaq. Bu barədə Rusiya Avtomobil Dilerləri Assosiasiyasının (ROAD) prezidenti Aleksey Podşekoldin bildirib.

Onun sözlərinə görə, hazırda Rusiya bazarında 60 Çin markasının avtomobilləri təmsil olunur. Onların yarısının nə distribyutor dəstəyi, nə də rəsmi salonları var. Eyni zamanda, belə şirkətlər ayda 100-dən çox avtomobil satmırlar.

"Yaxın gələcəkdə belə oyunçuların taleyi eynidir - məsələn, "Lifan", "Haima", "Zotye" və bir sıra başqaları ilə olduğu kimi Rusiya bazarını bağlamaq və tərk etmək", deyə Aleksey Podşekoldin bildirib.

Dilerlər hesab edirlər ki, yalnız satış həcminə görə ilk 15-liyə daxil olan avtomobil markaları rəqabətə tab gətirə bilər.

Paşa Məmmədli