"Apple" kapitallaşma üzrə dünya rekordu vuraraq, tarixdə bazar dəyəri 3,5 trilyon dollardan çox olan ilk şirkət olub. 

Valyuta.az xəbər verir ki, bu barədə "Quartz" yazıb.

Çərşənbə axşamı, iyulun 9-da keçirilən ticarət nəticəsində Amerika texnoloji nəhənginin səhmləri 0,38% bahalaşaraq, bir səhm üçün 229,47 dollara bağlanıb. Nəticədə şirkətin kapitallaşması 3,51 trilyon dollara yüksəlib.

İyunun əvvəlindən, şirkətin növbəti "iPhone", "iPad" və "Mac" əməliyyat sistemlərində süni intellekt tətbiq etmək planlarını elan etdikdən sonra "Apple" səhmləri davamlı olaraq yüksəlir. "Apple Intelligence" "ChatGPT"ni yaradan "OpenAI" ilə əməkdaşlıqda hazırlanır.

Hazırda "Microsoft" kapitallaşmaya görə ikinci yerdədir. Onun bazar dəyəri iyulun 9-da keçirilən ticarət sessiyasının yekunlarına görə, 3,42 trilyon dollar təşkil edib. İlk üçlüyü 3,23 trilyon dollarla "Nvidia" qapayır.

Son 23 ildə yalnız altı Amerika şirkəti kapitallaşmaya görə bazar lideri olmağı bacarıb: "Nvidia", "Microsoft", "Apple", "Amazon", "Exxon Mobil" və "General Electric".

Paşa Məmmədli