Yay fəslinin ikinci ayını yaşasaq da, bazarlarda mövsümi meyvə və tərəvəzlərin qiyməti hələ də ucuzlaşmayıb. 

Valyuta.az kənd təsərrüfatı məhsulların qiymətini öyrənmək üçün Bakının böyük bazarlarından biri olan 8-ci kilometr bazarına baş çəkib.

Doğrudur, bazarda çeşid bolluğu olsa da, qiymət bahalığı da hiss olunur. 

Keçən ilin bu dövrü ilə müqayisədə meyvə-tərəvəzlərin qiymətində 1-2 manat artım var. 

Bazarda satılan ən ucuz tərəvəzlərdən olan xiyarın kilosu alıcılara 1 manata təklif olunur.  Pomidorun qiyməti isə 1-1.50 manat, yaşıl bibərin kilosu 2-2.50 manat, rəngli bibərlər 3 manat, badımcanın qiyməti 0.60 qəpik- 1.50 manat arasıdır. Soğanın qiyməti isə daha münasibdir. 3 kq soğan 1 manatdır. Qırmızı soğanın qiyməti isə bir az baha, 1-1.50 manata satılır. Kartof isə 0.50 qəpikdən satılır. Göbələyin qiyməti isə ucuzlaşıb, bazarda 3-4 manat arası satılan göbələk hazırda 2 manatdır. 

Meyvələrin qiyməti isə tərəvəzlərə nisbətən daha bahadır. Belə ki, əriyin qiyməti bazarda 2.50-3 manat, gilasın qiyməti 2.50 manatdan başlayaraq 4 manata qədər artıb. Gilənar da elə bu qiymətə satılır. Bazarda ən ucuz meyvə isə şaftalı və alçadır. Onların qiyməti 1-1.50 manat arası dəyişir. 

Çiyələyin bir kilosu 1.50manata təklif olunur, lakin bu qiymətlər 3 manata qədər artır. 

Satıcılarla söhbət zamanı bildirdilər ki,  qiymət bahalaşmasının səbəbi yazın əvvəlindən başlayan qeyri-sabit hava şəraiti olub. Belə ki, intensiv yağan yağışlar, dolu, külək, meyvə bağalrına, tərəvəz sahələrinə ziyan vurub. Ona görə də onların qiyməti yerlərində də bahadır. 

Davud