“İnflyasiya ilə mübarizə kontekstində uzunmüddətli dayanıqlı müsbət nəticələrin əldə olunması üçün ilk növbədə yerli istehsal stimullaşdırılmalıdır”.

Valyuta.az xəbər verir ki, bunu Azərbaycan Texniki Universitetinin İnnovativ İqtisadi Araşdırmalar Mərkəzinin rəhbəri Elşad Məmmədov dünyadakı inflyasiyanın Azərbaycana təsiri ilə bağlı brifinqdə deyib.

O, qeyd edib ki, inflyasiyanın qarşısının alınması üçün bəzi addımlar atılmalıdır:

“Bunlardan biri də milli valyuta məzənnəsinin sabitliyinin qorunmasıdır. Bundan başqa su, işıq və qaz qiymətlərinin sabit saxlanılması təmin olunmalıdır. Çünki, bu tariflərdəki dəyişikliklər bilavasitə inflyasiyaya təsir edir. İnflyasiya ilə mübarizənin ən effektiv üsulu isə innovasiyaların iqtisadiyyatda olmasıdır. Məhsulların daha innovativ olması onların qiymətlərini aşağı salır. Biz bunun texnoloji inkişafda da şahidi oluruq. Texnoloji cəhətdən inkişaf etmiş ölkələr məhz innovasiyaların, büdcəki elm xərclərin payının artırılması hesabına qiymətlərin sabitləşməsinə və inflyasiya ilə mübarizəyə nail olurlar. Bu siyasətin ardıcıl şəkildə aparılması şərti  ilə inflyasiya ilə mübarizə aparmaq effektiv olar”.

Əvəz Həsənov