Türkiyə Ticarət və Sənaye Palatasının (TOBB) məlumatına görə, Azərbaycan iş adamlarının Türkiyəyə yatırımları 4 dəfə artıb. 2024-cü ilin yanvar ayında azərbaycanlı iş adamları Türkiyədə yaradılan şirkətlərə ümumilikdə 9 milyon 250 min lirə yatırım ediblər. Türkiyə bazarında yatırım etmək azərbaycanlı iş adamlarına nə qədər faydalı olur? Hansı səbəblərdən azərbaycanlı iş adamları daha çox Türkiyə bazarına yatırım edirlər?

Bu barədə Valyuta.az-a danışan iqtisadçı ekspert Xalid Kərimli bildirb ki, investisiyalar üçün dövlətlərarası münasibətlər yaxşı olmalıdır. İş adamları bilməlidirlər ki, müxtəlif səbəblərdən nə zamansa təqiblərə məruz qalmayacaqlar:

“Xarici ölkələrdə bəzi iş adamlarının əmlakının dondurulması ilə bağlı xəbərlər eşidirik. Buna görə də, investorlar daha çox dövlətlərarası əlaqələri yaxşı olan, gələcəkdə problemlər ilə üzləşə bilməyəcəyi bazarlara meyl edirlər. Türkiyə bazarının azərbaycanlı iş adamları üçün bəzi müsbət tərəfləri var. Məsələn, Avropa Birliyi ölkələrinə getmək üçün uzun prosedurdan keçmək lazım olduğu halda, Türkiyəyə sadəcə şəxsiyyət vəsiqəsi ilə getmək olur. Bundan əlavə, vəsait yatırımı edən zaman Avropa vəsaitin mənbəyi ilə bağlı bir çox tələblər irəli sürür. Amma Türkiyədə bu kapital ilə bağlı müəyyən sərbəstlik var. Dil faktoru da burada müəyyən rol oynayır ki, azərbaycanlı iş adamları özlərini tam ifadə edə bilirlər. Eyni zamanda inflyasiya olmasına baxmayaraq, Türkiyə iqtisadiyyatı dinamik sürətdə artır. Bu baxımdan da bizim sahibkarlar üçün Türkiyə bazarı maraqlıdır”.

Əvəz Həsənov