“Bu məsələlər mərhələli şəkildə həyata keçirilə bilər. Yəni, icbari tibbi sığorta çərçivəsində belə xəstəliklərin ambulator mərhələdə davam edən sağalma periodunu nəzərə alaraq müəyyən dərman preparatları konkret bir müddət üçün müalicə paketinə daxil edilə bilər”. 

Bunu Valyuta.az-a professor Adil Qeybulla dövlət hesabına verilən dərmanların siyahısının genişləndirilməsi təklifini şərh edərkən deyib. 

Adil Qeybulla əlavə edib ki, lakin xroniki xəstəliklər - şəkərli diabet, qan təzyiqi, hemofiliya kimi xəstəliklərdə xəstələrin bu dərmanlara ömürlük ehtiyacı var: “Həmin dərmanlar hələlik dövlət proqramı ilə xəstələrə verilir. Sadəcə olaraq, bu dərman preparatlarının paketi hazırlandıqda onların keyfiyyət parametrlərini ilkin olaraq nəzərə almaq mümkündür. Hətta bəzi keyfiyyətli dərmanların vətəndaşla dövlət arasında bölüşməsi praktikası da bir müddət tətbiq oluna bilər. İcbari Sığortanın imkanları da buna tam cavab verəndən sonra dövlət tərəfindən həmin dərmanların xəstələrə verilməsi tam qarşılana bilər. İndi isə bu proses mərhələ-mərhələ həyata keçirilə bilər”. 

Həmsöhbətimiz əlavə edib ki, bütün bunlar isə sığorta üçün ayrılmış imkanların çərçivəsində dəyərləndirilməlidir:

“Ən əsası isə bu gün icbari tibbi sığortanın tətbiq edilir və kifayət qədər mürəkkəb müayinə metodlarından, əməliyyatlardan insanlar pulsuz faydalana bilir. 

Bunun bütün sahələri tam əhatə eləməsi, daha effektiv çalışması və s. üçün də zaman tələb olunur. Müəyyən təşkilatı nöqsanları nəzərə almasaq, icbari tibbi sığortadan xeyli vətəndaşın yararlandığını görürük”. 

Qeyd edək ki, dövlət hesabına verilən dərmanların siyahısının genişləndirilməsi təklif edilib. Bildirilib ki, hepatit, şəkərli diabet, hemofiliya, talassemiya və bu kimi başqa xəstəliklərdən əziyyət çəkən, xüsusilə aztəminatlı ailələrdən və əhalinin həssas qruplarından olan vətəndaşlarımızın mövcud durumu nəzərə alınaraq, dövlət büdcəsi hesabına verilən dərmanların və digər vasitələrin daha keyfiyyətliləri ilə əvəz edilməsi və siyahısının real ehtiyaclara uyğun genişləndirilməsi təklif edilir.

Davud