Mərkəzi Yeni Zelandiyada yerləşən bir şirkət elektrik avtomobillərinin akkumulyatorlarında  yeni üsuldan istifadə etməyə başlayıb. 

Valyuta.az xəbər verir ki, şirkət akkumlyatorların hazırlanmasında yonqardan yararlanır. Onlar atılmış yonqarı sintetik qrafitə çevirməyi bacararaq mühüm bir irəliləyiş göstərmiş olub. Bununla da akkumulyatorlarda istifadə edilən qrafit üçün dünyanın Çindən asılılığını azalacağı gözlənilir. “CarbonScape” adlı şirkət, yonqardan əldə olunan alternativ qrafitin daha davamlı bir həll təklif etdiyini və Avropanın litium-ion batareyaları üçün Çindən asılılığını azaldacağını bildirib. 

Elektrikli avtomobil akkumulyatorlarının istehsalının açarı olan qrafit təbiətdə tapılan və hasil edilən bir maddədir. Sintetik qrafit neft məhsullarından istehsal olunur. Baş direktor İvan Vilyamsın dediyinə görə, “CarbonScape” tərəfindən yonqardan hazırlanmış qrafit ekoloji cəhətdən daha təmizdir. 

Mövzuyla əlaqədar “Euronews”a danışan şirkət rəsmisi, "Ənənəvi olaraq, sintetik qrafit istehsalında qalıq yanacaq əsaslı xammallardan istifadə edilir. İstehsal edilən hər ton qrafit üçün 35 ton karbon qazı buraxılır. Biz Avropa və Şimali Amerikada hər il istehsal olunan meşə məhsullarının beş faizindən azını istifadə etməklə qlobal qrafit ehtiyacının yarısını qarşılaya bilərik" - sözlərini söyləyib. 

Keçən il “CarbonScape” Finlandiya və İsveçin meşə təsərrüfatı şirkəti “Stora Enso” və Honq-Konqda yerləşən batareya istehsalçısı “Amperex”dən cəmi 18 milyon dollarlıq sərmayə alıb. 

“CarbonScape”in ​​yonqar ağacından sintetik qrafit istehsalından sonra, 2030-cu ilə qədər bu maddənin qlobal tədarükünün 777 min tona çatacağı gözlənilir.

Elmir