Avropa Kosmik Agentliyinin (ESA) 1995-ci ildə orbitə buraxılan və 10 il əvvəl istismar müddətini başa vuran ERS-2 peyki nəzarətdən çıxıb.

Valyuta.az xəbər verir ki, 11 ton ağırlığında olan peykin nəzarətsiz şəkildə Yer atmosferinə daxil olacağı açıqlanıb. 

ERS-2 Yerin müşahidəsi üçün istifadə edilən peyk idi. O, atmosfer, okeanlar və quru kütlələr haqqında məlumat toplayıb. ERS-2 tərəfindən toplanan məlumatlar tədqiqatçılara iqlim dəyişikliyi və ətraf mühitin çirklənməsi kimi məsələlərdə kömək edib. ESA-nın nəhəng peykinin hara enəcəyini indiki mərhələdə söyləmək mümkün olmadığı bildirilib.

Agentlik nəzarətdən çıxan peykin Yerin atmosferinə çərşənbə günü, fevralın 21-də  daxil olacağını gözləyir. Mütəxəssislər bildirirlər ki, aparat böyük ehtimalla atmosferə girən kimi parçalanacaq və yerə düşməzdən əvvəl yanacaq. Ancaq kiçik parçaların yerə düşərək insanlara zərər vermə ehtimalı var.

Bu da o deməkdir ki, planetimizə növbəti kosmik tullantılar düşəcək. Yerin orbiti artıq kosmik tullantılarla doludur və daha çox raket buraxıldıqca, peyklər sıradan çıxarıldıqca vəziyyət daha da pisləşməyə doğru gedir. Keçən ay Yaponiya çıxış yolu kimi nüvə enerjisini işə salan lazerlərdən istifadə edərək kosmik zibilləri təmizləməyin mümkün olduğunu açıqladı. Hazırda planetin ətrafında təxminən 100 trilyon köhnə peyk hissəsinin olduğu təxmin edilsə də, toplanmış kosmik zibilin aktiv peyklərə də zərər verə biləcəyi vurğulanır.

Elmir