Biznes adamları bir çox sahələrdə özlərini sınamağa çalışırlar. Bu sahələrdən biri də göbələk təsərrüfatıdır. Göbələk təsərrüfatında özlərini sınamaq işləyən şəxslər nələri bilməli olduğları, xərcləri, gəlirləri və başqa məsələlər ilə bağlı Natiq Xudaverdili ilə danışdıq.

Valyuta.az xəbər verir ki, Göygöl rayonunun Üçtəpə kənd sakini Natiq Xudaverdili 2022-ci ildən “Veşenka” göbələk növünün istehsalına başlayıb. “Veşenka” göbələyinin yetişdirilməsində saman, kəpək və günəbaxan tumlarından istifadə olunur. Məhsul 25 günə yetişir, yetişdikdən sonra qablaşdırılaraq satışı həyata keçirilir.

N.Xudaverdili bildirib ki, göbələkxana qurmaq istəyən şəxslər ilk növbədə onu bilməlidir ki, bu, o qədər də asan iş deyil. Burada böyük zəhmət, disiplin, ən vacib də gigiyena şəraitlərinə riayət etmək lazımdır:

“Bu işlə məşğul olmaq istəyən şəxslərin göbələk yetişdirməklə bağlı anlayışı varsa, özü bu məhsulu lazım olan kimi yetişdirə bilər. Anlayışı olmayan şəxslər mütəxəssisə müraciət etməlidir, çünki göbələk elə bir məhsuldur ki, orada bütün parametrlərə ciddi nəzarət etmək lazımdır”.

“İlk olaraq Qida Təhlükəsizliyi Agentliyindən sertifikat alınmalıdır. İstehsalçının məhsulu mağazalara satması üçün identifikasiya nömrələri, etiketlər, VÖEN açılması, işçilərin vergidən qeydiyyatdan keçirilməsi, Respublika Gigiyeva və Epidemiologiya Mərkəzindən sənəd alınmalıdır. Bu sahə elədir ki, qida təhlükəsizliyi ilə işləyirsən. Çünki, göbələyin təhlükəsiz olması üçün hər ay onu laboratoriyadan keçirmək lazımdır” – deyə sahibkar bu biznesi qurmaq istəyən şəxslərin keçəcəyi prosesləri izah edib.

Hər sahədə risklərin olduğu kimi, bu sahədə də müəyyən risklərin olduğunu qeyd edib: 

“Bu işin bizdən asılı olmayan riskləri var. Məsələn, təbiət hadisələri risk yarada bilir. Sahibkarın məsuliyyətsizliyi, vaxtında qulluq olunmaması, mütəxəssisə müraciət edilməməsi və s. digər amillər də risk yaradır. Göbələk elə bitkidir ki, onu düzgün yetişdirməyən zaman lazım olan məhsulu vermir. Bu da təsərrüfatın iflasa uğramasına gətirib çıxara bilər” – deyə əlavə edib.

Bu təsərrüfatın xərclərindən danışarkən, ən çox xərc aparan avadanlıqların və avtomatlaşdırmanın olmasını vurğulayıb:

“Gübrəxana tam avtomatlaşmış formada işləməlidir. Bu avadanlıqlar çoxdur, onları saymaqla bitməz. Məsələn, saman üyüdən, ventilyator, su nasosları, filterlər və s. kimi avadanlıqlar çox xərc tələb edir”.

Bu təsərrüfatı qurmaq üçün lazım olan sərmayədən və əldə olunan gəlirdən danışan sahibkar qeyd edib ki, əslində bu suala tam dəqiq cavab vermək doğru olmaz:

“Bu təsərrüfat müəyyən miqdarda sərmaya tələb edir, amma onu da qeyd etmək lazımdır ki, bu sahə heç də ucuz başa gələn iş deyil. Çünki bu, təsərrüfatı qurmaq üçün lazım olan sərmayə onun həcmindən asılıdır. Amma nümunə olaraq deyə bilərəm ki, 100 kvadrat metrlik bir ərazidə göbələkxana qurmaq üçün təxminən 15-20 min arasında sərmayə lazımdır. Təbii ki, bu binanın qurulmasından asılı olaraq dəyişə bilər. Həmin bu ərazidən ay ərzində 1000-1500 manat gəlir əldə etmək olar”.

Əvəz Həsənov