Avropa İttifaqı Rusiyanın tammiqyaslı işğalının ikinci ildönümü ərəfəsində Ukraynaya əlavə yardım paketi hazırlayır.

Valyuta.az xəbər verir ki, "Financial Times" qəzetinin yazdığına görə, paket Qərbin Ukraynaya azaldılmış yardımının bərpasına yönələcək, pul, silah və Rusiya Federasiyasına qarşı sanksiyaları əhatə edəcək.

Nəşrin mənbələrinin bildirdiyinə görə, söhbət həm də yaxın 4 il ərzində Kiyevə 50 milyard avronun ayrılması ilə bağlı çoxdan gözlənilən razılaşmadan gedir, onun bir hissəsi müqavilə bağlanan kimi ödənilə bilər.

Financial Times-ın qeyd etdiyi kimi, Aİ-nin yeni sanksiyaları aktivlərin dondurulması və səyahət qadağaları siyahısına daha çox fiziki və hüquqi şəxslərin əlavə edilməsinə yönələcək.

Bundan əlavə, hər il 5 milyard avro hərbi yardım və dondurulmuş Rusiya aktivlərindən əldə edilən gəlirlərin Ukraynaya köçürülməsi təmin edilir.

Paketə həmçinin Rusiyanın Ukraynaya genişmiqyaslı müdaxiləsi ilə bağlı şirkətlər və şəxslər üçün 13-cü sanksiya dəsti daxil olacaq.

Daha əvvəl bildirilmişdi ki, 2023-cü il dekabrın 17-də Ukrayna prezidenti Vladimir Zelenski dondurulmuş Rusiya aktivlərinin Ukraynaya ötürülməsi üçün lazım olan qərarların konturlarının artıq hazırlandığını bildirib.

6 yanvar 2024-cü ildə Zelenski dondurulmuş Rusiyanın xaricdəki təxminən 300 milyard dollarlıq aktivlərinin Ukraynaya köçürülməsinə çağırıb.

16 yanvar 2024-cü ildə ABŞ Rusiya Federasiyasının dondurulmuş aktivlərinin Ukrayna üçün istifadəsi ilə bağlı çətinlikləri elan edib.

Avropa İttifaqının Xarici İşlər və Təhlükəsizlik Siyasəti üzrə Ali Nümayəndəsi Josep Borrel deyir ki, immobilizasiya olunmuş Rusiya aktivlərinin istifadəsi ilə bağlı qərar Aİ Xarici Əlaqələr Şurasının növbəti iclasına qədər veriləcək. Aİ Şurasının iş planına əsasən, növbəti iclas martın 18-nə təyin edilib.

2024-cü il yanvarın 23-də Aİ bir sıra ölkələrin Rusiya aktivlərinin müsadirə edilməsinə qarşı olduğuna eyham vurub.

Nicat