2022-ci ilin fevralından Rusiya ilə müharibə vəziyyətində olan Ukraynada elektrik avtomobil satışında sürpriz partlayış baş verib .

Valyuta.az xəbər verir ki, Fransanın aparıcı nəşrlərindən olan “Le Figaro”nun məlumatına görə, ölkədə elektriklə işləyən avtomobillərin satışı müharibədən əvvəlki dövrlə müqayisədə 10 dəfə artıb.

İlon Maska məxsus “Tesla” markalı avtomobillər bu artımdan ən çox pay alan modellər olub. Sektor məlumatlarını araşdıran qəzet, 2021-ci ilin sonunda 8 min 541 olan qeydiyyatdan keçmiş elektrik avtomobillərinin sayının 2023-cü ilin yanvarında 46 min 830-a yüksəldiyini açıqlayıb.

Ölkədəki hərbi münaqişələrə və işğal şəraitinə baxmayaraq, bu artım ötən il də davam edib. 2023-cü ilin yanvar-noyabr aylarında Ukraynada elektriklə işləyən avtomobillərin sayı təxminən iki dəfə artaraq 83 min 116-ya çatıb.  

Ukrayna dövlət bankı “Oschadbank”ın baş direktoru Anton Tiutiun açıqlamasında, "Yanacaq qiymətlərinin artdığı bir dövrdə ilk dəfə olaraq elektrikli avtomobil kreditlərində əhəmiyyətli bir artım müşahidə edirik" - deyib. 

Elektrikli avtomobillər üçün 11 min enerji doldurma məntəqəsi olan Ukrayna, bu məntəqələrin sayına görə Nyu-Yorku qabaqlayır. Bu rəqəm həm də qonşu Polşadakı stansiyalardan iki dəfə çoxdur. “Le Figaro” xüsusilə hökumətin bəzi vergiləri ləğv etməsindən və ikinci əl avtomobillərin idxalına icazə verməsindən sonra ölkədə tələbatın artdığına diqqət çəkib. Ukraynada 2021-ci ildə sayı 454 olan “Tesla” markalı avtomobilləri 2023-cü ildə 4 min 600-ə qədər yüksəlib. Bununla belə, qəzetdə yer alan xəbərə görə, sözügedən avtomobillərin əhəmiyyətli bir hissəsini Kanada və ABŞ-dan xarab vəziyyətdə alınıb.

Qəzetə danışan ukraynalı avtomobil eksperti bildirib ki, bu maşınların əhəmiyyətli bir hissəsi alındıqdan sonra ukraynalılar tərəfindən təmir edilərək satılıb. Ekspert bu yolla ayda 100-ə yaxın “Tesla” modelinin yenilənərək daxili bazara təqdim edildiyini bildirib.

Elmir