Tez-tez yumurtanın ucuzlaşıb-bahalaşması ilə bağlı medialarda dərc olunan xəbərlər insanlar arasında birmənalı qarşılanmır. Bəzi şəxslər düşünür ki, tez-tez qiyməti 1-2 qəpik artıb-azalan yumurta haqqında məlumatların paylaşılması bir o qədər vacib deyil. 

Bəs yumurta ilə bağlı bu xəbər ajiotajına səbəb nədir?

Valyuta.az bu sualı iqtisadçı Natiiq Cəfərli ilə müzakirə edib. 

Natiq Cəfərli deyib ki, hazırda yumurta tələbat məhsulu olduğu, məişətdə çox işləndiyi, aztəminatlı ailələrdə daha çox istifadə olunduğu, tez hazırlanan yemək növü də olduğu üçün bununla bağlı məlumatları həssas məsələyə çeviriblər:

"Buna görə də insanlar həssaslıq göstərir. Yumurta gündəlik tələbat məhsuludur. Hətta Nazirlər Kabinetinin bizim üçün təyin etdiyi yaşayış minimumu normalarında hər insan üçün ilə 150 yumurta nəzərdə tutulub. Bu da təqribən 2 günə bir 1 yumurta deməkdir".

Ekspert vurğulayıb ki, yumurta ilə bağlı narahatlıq tək bizim ölkədə deyil:

"Bu yaxınlarda Rusiyada yumurta müşavirəsi belə keçirildi. Rusiya prezidenti Vladimir Putinin canlı yayımı zamanı yumurta ilə bağlı suallar verildi, və bu məsələnin Rusiyada da nə qədər həssas olduğu ortaya çıxdı. Nəticə etibarı ilə Rusiya indi Azərbaycandan, Türkiyədən və digər ölkələrdən kütləvi şəkildə yumurta almağa cəhd edir". 

Yumurtanın qiymətinin artmasının səbəbləri haqqında da danışan Natiq Cəfərli bildirib ki, yumurtanın qiymətinin artmasının səbəblərindən biri son 3 həftədə ardıcıl olaraq Rusiyaya göndərilməsidir:

"Bir həftədə 1 milyon 200 min ədəddən çox yumurta göndərilir. Bəlkə də il üçün hesablasaq, böyük rəqəm deyil, amma 3-4 həftədə bu qədər yumurtanın ölkədən ixrac olunması, yerli bazara təsir göstərdi və biz qiymət artımını müşahidə etdik".
 
Davud