"Toyota Motor" şirkəti təhlükəsizlik yastıqlarında yaranan problemlərə görə ABŞ-da satılan 1 milyondan çox avtomobili geri çağırmaq qərarına gəlib. 

Valyuta.az xəbər verir ki, bu barədə "Kyodo" agentliyi məlumat yayıb.

Bu, qısaqapanmaya səbəb ola biləcək ön sərnişin oturacağında sərnişin aşkarlama sisteminin sensorunun nasazlığıdır. Nəticədə, toqquşma zamanı təhlükəsizlik yastıqları açılmayacaq və yaralanma riski yaranacaq.

"Camry", "Corolla" sedanları, RAV4 krossoverləri, "Lexus ES" və RX modelləri də daxil olmaqla 2020-2022-ci illər arasında istehsal edilmiş avtomobillər diaqnostika və təmir üçün geri çağırılacaq.

Bundan əvvəl məlum olmuşdu ki, "Toyota Motor" Çin bazarından 570 min avtomobili təmir üçün geri çağıracaq. Geri çağırma kampaniyasına səbəb yanacaq sistemində nasazlıq olub.

2019-2023-cü illər arasında istehsal edilmiş "Toyota Corolla" avtomobilləri, eləcə də 2018-2022-ci illərdə istehsal olunmuş "Toyota Highlander" və "Lexus RX" avtomobillərində daxili nasazlıq səbəbindən yanacaq nasosunda çatlar əmələ gələ bilər.

Paşa Məmmədli