"Volkswagen" potensial partnyorları, o cümlədən "Renault" ilə münasib qiymətə elektrik avtomobilinin yaradılması üzrə əməkdaşlıq haqqında danışıqlar aparır. 

Valyuta.az xəbər verir ki, bu barədə Almaniyanın “Handelsblatt” qəzeti yazır.

Qəzetin mənbələrinin bildirdiyinə görə, danışıqlar çox erkən mərhələdədir. “Volkswagen” dəyəri 20 min avrodan çox olmayan sərfəli elektromobil platformasının hazırlanmasında əməkdaşlıqda maraqlıdır. İldə 200 mindən 250 minə qədər belə avtomobil istehsal etmək planlaşdırılır.

Mart ayında "Volkswagen" 25.000 avroya başa gələn və 2025-ci ilə qədər buraxılmalı olan elektrik avtomobili üzərində işlədiklərini açıqlayıb. Avtomobilin bir dəfə doldurulma məsafəsi 450 km, akkumulyatorun 10%-dən 80%-ə qədər doldurulması isə 20 dəqiqə çəkməlidir.

Noyabrın sonunda "Renault" elektrik avtomobilinə çevrilmiş yenidən canlanmış "Renault 5" modelinin ilk şəkillərini nümayiş etdirib. Avtomobilin başlanğıc qiyməti təxminən 25 min avro olacaq, yeni məhsul 2024-cü ilin fevralında Cenevrədə keçiriləcək Beynəlxalq Avtomobil Sərgisində təqdim olunacaq.

Paşa Məmmədli