"McDonald's Azərbaycan" şirkəti qarşıdakı 5 il ərzində Azərbaycandakı restoran sayını 50-yə çatdırmağı planlaşdırır.

Valyuta.az-ın məlumatına görə, bunu mətbuata açıqlamasında "McDonald's Azərbaycan" şirkətinin baş direktoru Oskar Boqopolskiy bildirib. 

O qeyd edib ki, indiyədək Azərbaycanda "McDonald's"ın 23 restoranı fəaliyyətə başlayıb və işçilərin sayı 2180 nəfərə çatıb. Beləliklə, qarşıdakı 5 ildə daha 27 restoran istifadəyə veriləcəkdir.

Xatırladaq ki, 1999-cu ildən ölkəmizdə fəaliyyət göstərməsi üçün hər cür şərait yaradılan "McDonald's Azərbaycan” şirkəti Vətən müharibəsi vaxtı öz rəsmi səhifəsində Qarabağla bağlı dəstək postunu silmişdi. Belə ki, şirkət əvvəl “Qarabağ Azərbaycandır” – deyə paylaşım etsə də, ermənilərin boykotundan sonra postu silərək, Azərbaycanın ərazi bütövlüyünü şübhə altına almışdı.

Sonra açıqlama verərək, siyasətə qarışmadıqlarını, əsas amallarının insanları qida ilə təmin etmək olduğunu bildirsələr də, Rusiya-Ukrayna savaşında Ukraynaya dəstək verdiklərini, hətta Rusiyadan tamamilə çəkildiklərinin şahidi olduq.

Mahir