Nüfuzlu insayder "Digital Chat Station" təqdimatı yalnız gələn il baş tutacaq flaqman "Xiaomi 14 Ultra" smartfonunun kamera xüsusiyyətlərini açıqlayıb. 

Valyuta.az xəbər verir ki, bu barədə "ITHome" portalı məlumat yayıb.

"Weibo" sosial şəbəkəsindəki yazıda insayder bildirib ki, "Xiaomi 14 Ultra" sələfi "Xiaomi 13 Ultra" kimi dörd 50 meqapiksellik kamera ilə təchiz olunacaq. Bununla belə, yeni məhsul f/1.6-dan f/4.0-a dəyişəcək təkmilləşdirilmiş dəyişən apertura sistemi alacaq. Həmçinin, "Xiaomi 14 Ultra" kamerası müxtəlif nisbətlərdə optik böyütməni dəstəkləyəcək: 0,5x, 3,2x və 5x.

Şayiələrə görə, "Xiaomi 14 Ultra" 2K təsvir ölçülü və 120 Hz tezliyə malik AMOLED displey, "Qualcomm Snapdragon 8 Gen 3" çipi, 5500 mAh batareya, 32 MP selfi kamerası və xüsusi "HyperOS" qabığı alacaq.

"Xiaomi 14 Ultra"nın təqdimat tarixi məlum deyil. Cihazın Çində 2024-cü ilin martında təqdim ediləcəyi gözlənilir. Çox güman ki, yeni məhsul Ultra xəttinin digər modelləri kimi yalnız Çin bazarında satılacaq.

Paşa Məmmədli